Deputadu Ernesto Fernandes ‘Dudu’ hatete, povu presiza hakmatek, moris iha situasaun ne'ebé estavel atu bele uza tempu ne'e hodi buka moris no hadi'a jerasaun sira nia moris iha futuru.

Nia mós husu ba lideransa tuan sira ne'ebé sei moris hanesan Xanana Gusmão, Taur Matan Ruak, Mari Alkatiri, Don Carlos Ximenes Belo, Francisco Guterres ‘Lú-Olo’ no Lere Anan Timur atu tuur hamutuk sai lian ida, hodi hadi'a povu nia moris.

Nia hatutan, dezenvolvimentu atu la'o presiza lideransa másimu sira ne'e nia prezensa hodi hatún tensaun polítika iha rai laran, nune'e bele garantia estabilidade governativa hodi lori dezenvolvimentu ba povu nia moris.

"Maun Boot sira tenke hamutuk hodi hatún tensaun polítika, tanba povu lakohi atu mate tan dala ida", dehan Dudu, iha Parlamentu Nasionál, horisehik.

Tuir nia, kuandu polítiku na’in sira la hamutuk, povu mak nafatin terus nafatin. Atu evita ida ne’e presiza kria kondisaun liu husi polítika no programa Estadu nian.

Alende ne'e, nia mós husu nafatin ba governu iha períodu tinan lima tenke kria kondisaun hodi haloot ruin saudozu sira nian ne'ebé daudaun ne'e rai hela iha osoariu. Atu dignifika sira nia luta, presiza tau iha fatin ne'ebé dignu, harii jardín hodi tau sira ho didi’ak.

Nia mós hatete, daudaun ne'e jerasaun tuan hela na’in hira de'it ona, tanba ne'e presiza kria ona estatutu veteranu nian.

Hataan ba kestaun ne'e, Primeiru Ministru, Mari Alkatiri hatete, preokupasaun ne'ebé hato'o ona ne'e VII Governu promitidu sei tau atensaun ba ruin eroi sira nian.

Nune'e mós ba asuntu estatutu veteranu nian daudaun ekipa halo ona sei finaliza.