Membru VII Governu na’in lima ne'ebé simu tan pose ba datoluk ne’e mak Ministra Justisa (MJ), Maria Natália Carrascalão, Ministru Turizmu (MT), Manuel Florêncio da Cannosa Vong, Vise-Ministra Negósiu Estranjeiru no Kooperasaun (MNEK), Adalgisa Albertina Xavier dos Reis Magno, Vise-Ministra Planu Finansas, Sara Lobo Brites no Vise-Ministru Turizmu, Rui Menezes.

Liu husi nia diskursu Prezidente Repúblika, Francisco Guterres ‘Lú-Olo’ hateten, ho pose ba membru Governu foun ne’ebé bele ona kompleta estrutura governu hodi hatudu servisu di'ak ba povu Timor.

Nune’e, Xefe Estadu mós kongratula ba maluk feto sira na’in tolu ne'ebé envolve ona iha Membru Governu hanesan Ministra Justisa Maria Ângela Carrascalão, Vise-Ministra Publika Finansas Sara Lobo Brites, no Vise-Ministra MNEK Adalgisa Magno.

“Ho laran ksolok mak ha’u haree maluk feto sira tama tan iha Governu”, dehan Lú-Olo, iha Salaun Repúblika Populár Xina, Palásiu Prezidensiál, horisehik.

Xefe Estadu dehan, Ministériu Justisa mak riin importante ne'ebé atu tane Estadu Direitu Demokrátiku. Pasta justisa ne’e la'ós fasil, maibé konfia hein katak ministra foun sei haka'as aan no hetan rezultadu di'ak.

Alende ne’e, PR sauda mós ba Vise-Ministra Adalgisa Magno hanesan feto diplomata ne'ebé iha esperiénsia no daudaun ne’e reprezenta hela iha Embaixadór Timor Leste iha Singapura.

Tan ne’e, Lú-Olo fiar katak ho funsaun ne'ebé simu Adalgisa sei esforsu liután ekipa MNEK no sei hasa’e koñesimentu kona ba ASEAN iha Konsellu Ministru. Sauda mós ba Vise-Ministra Planu no Finansas Sara Lobo Brites.

Nune’e mós Lú-Olo fiar katak Ministru Turizmu ho ninia vise sei tau prioridade ida estratéjiku atu diversifika ekonomia Timor Leste no haforsa kontribuisaun setór emprezariál nian.

Tanba ne’e, liu husi ida ne’e bele hamosu empregu ba timoroan no bele tane liu tan ekonomia TL. Tanba presiza sosializasaun no promove turizmu istóriku, riku soin no floresta no ambientál rai maran ho tasi laran.

Entretantu, serimónia pose ne'ebé hala'o iha Palásiu Prezidente Repúblika, Bairru-Pité, Tersa (17/10) iha mudansa uitoan tanba kauza husi udan. Ne’e duni, hafoin pose la konsege realiza konferénsia imprensa.