Prezidente Parlamentu Nasionál rasik hasai ona karta rua ba eis-deputadu no eis-xefe bankada sira hodi fó hanoin atu ba sira ne’ebé uza karreta Parlamentu Nasionál nian hodi entrega hikas.

“Liu husi enkontru Konsellu Administrasaun deside kansela ona leilaun karreta tuan, maibé ba akizisaun karreta foun ba deputadu IV lejizlatura kontinua”, dehan portavós Presidente Parlamentu Nasionál, Lídia Ana Belo, iha Uma Fukun PN, Sesta (13/10).

Desizaun Konsellu Administrasaun Parlamentár, kona-ba kanselamentu karreta tuan ne’e Prezidente PN halo ona karta xamada ba deputadu III lejizlatura atu hatama karreta hahú iha loron 11 Outubru to’o 25 Outubru 2017.

Data limitasaun iha semana rua nia laran, maibé eis-deputadu sira ne’e la hatama mos Parlamentu Nasionál la obrigatoriamente foti karreta ne’e, maibé kontinua halo karta xamada to’o sira entrega.

Parlamentu Nasionál sei la obriga, tanba sira hanesan órgaun soberania presiza dignifika sira hodi hanoin mós kontribuisaun ne’ebé sira halo durante sira-nia mandatu.

“Ami fiar katak sira sei koopera hodi entrega hikas karreta Parlamentu Nasionál, tanba daudaun ne’e ami halo hela esforsu hodi halo komunikasaun ba Deputadu III lejizlatura hotu atu bele koopera”, tenik nia.

Deputadu III Lejizlatura ne'ebé uza karreta prado tuan hamutuk 45 mak to’o agora seidauk hatama. Nune’e, Deputadu 20 mak entrega, daudaun karreta sira ne’e para ona iha resintu Parlamentu Nasionál atu halo jestaun ba karreta ne’e tuir lei haruka.