Akontesimentu baku meza ne’e mosu iha diskusaun loron daruak, Tersa (17/10), bainhira deputada Bankada CNRT, Albina Marçal Freitas foti kestaun kona-ba problema pasadu nian ne’ebé iha relasaun ho Primeiru Ministru, Mari Alkatiri. Maibé, iha liafuan naksalak uitoan, entaun deputadu balun hamnasa, nune’e halo deputada ne’e ‘raan sa’e’.
Nune’e, Deputada Albina baku meza hodi hakilar dehan “imi doutór, ha'u la'ós doutór, mas ha'u funu na'in ida. Ne’ebé ha'u ko'alia ne’e ita rona malu”, dehan nia, iha plenária, ho lian makaas.
La'ós de’it ida ne’e, deputadu sira husi Bloku Koligasaun (BK) Bankada FRETILIN no Partidu Demokrátiku (PD) mós haree malu ho koligasaun Aliansa Maioria Parlamentár (AMP) husi Bankada CNRT, PLP no KHUNTO ‘matan la moos’.
Entretantu, situasaun seluk iha Parlamentu Nasionál haree husi aspetu seguransa la hanesan loron baibain, entidade sira ne'ebé atu tama asiste debate ne’e tenke hetan pasa revista ho aparellu detesaun seguransa sira nian.
Pasa revista ne'e halo husi seguransa sivíl edifísiu PN ne'ebé reforsa husi PNTL Unidade Batallaun Orden Públiku (BOP), hodi halo seguransa operasaun iha resintu Parlamentu Nasionál.
Haree ba kestaun diskusaun ne’ebé ladún armonia iha Uma Fukun PN, Deputadu Bankada KHUNTO, António Verdial hatete, hanesan deputadu iha parlamentu nasionál mai husi partidu ketak-ketak maibé mesak timoroan.
Diskusaun mak hanoin la kona malu, maibé buka atu entende malu nafatin hodi lori dezenvolvimentu ba povu.
"Ha'u hanoin ita mai iha ne'e atu reprezenta povu hodi lori sira nia aspirasaun mai iha parlamentu", dehan nia, iha plenária PN, horisehik.
Nia hatutan, maski ho polítika ne'ebé la hanesan, maibé hamutuk atu lori dezenvolvimentu ba povu nia moris di'ak.
Nune’e, Primeiru Ministru, Mari Alkatiri, la kontente ho situasaun debate ba loron daruak nian kompara ho loron dahuluk nian ne'ebé deputadu pro-ativu iha debate.
"Ha'u la kontente ho diskusaun ne'e tanba deputadu barak retira lakohi halo diskusaun. Ha'u la hatene ne'e retira ho ho estratéjia ka oinsá", dehan PM Alkatiri.
Povu Laran Taridu
Povu Timor ne’ebé lokaliza iha Kapitál Dili hahú laran taridu ho tensaun polítika ne'ebé mosu entre lideransa partidu polítiku sira iha Parlamentu Nasionál (PN).
Ne’e duni, husu ba lider polítiku sira ne'ebé oras ne’e povu fó fiar hodi reprezenta sira iha Uma Fukun PN, bainhira hala’o polítika tenke haree ba interese komun, labele interese partidária no hanoin de'it mak atu hadau podér.
Komunidade Suku Komoro, Clementino Martins, husu ba lider partidu polítiku sira tenke kolabora malu, mezmu iha ideia ne'ebé diferente, presiza foun hanoin ba malu hodi buka solusaun.
“Mezmu diferente ideia maibé presiza tuur hamutuk hodi buka solusaun”, dehan nia.
Entretantu, nia dehan, kuandu programa ne'ebé Governu aprezenta la pasa posibilidade sei mosu eleisaun antesipada, maibé Clementino rasik lakohi ona atu soe tempu ba eleisaun.
Nia dehan sei halo boikota ba eleisaun antesipada, tanba sira fo ona sira nia votu deputadu sira ukun. Sira lakohi tan atu repete sira nia votu hodi fó ba partidu polítiku sira hodi hadau malu podér.
