Ema hirak ne’ebé veteranu ne’e lori kompostu husi faluk, oan-kiak, no joven sira iha munisípiu ne’e.

Liu ninia komísiu iha Kampaña polítika partidu CNRT nian iha Baukau, abertamente Nunura deklara katak, apoiu ne’e fó ba eis-Comandante em Chefe FALINTIL, Kay Rala Xanana Gusmão, la’ós ba partidu CNRT.

“Sira mai apoiu la'ós tanba partidu CNRT, deskulpa! Ha'u lori sira mai tanba Xanana,” deklara Nunura.

Nia hatutan, bainhira lider CNRT sira hatene hamaus ema barak sei hakarak mai iha partidu ne’e. Ne’e duni, polítika tenke hatene hamaus no loke odamatan ba ema hotu no partidu hotu-hotu.

Atualmente, nia dehan, ema barak hakarak fó apoiu tanba haree ba figura Kay Rala Xanana Gusmão nian. Tanba ne’e, ninia estimasaun votante hamutuk 240.000 sei vota ba CNRT tanba haree ba nia figura.

“Sobrevivente ida hamutuk ho Xanana ida mak ha'u (Nunura). Xanana laiha, ai-laran laiha. Xanana laiha, klandestina laiha, ukun rasik-aan laiha”, tenik nia.

Tanba ne’e, Nunura fó hatete ba militante no simpatizante sira katak, Xanana sei moris tenke hamutuk ho nia, tanba nia mak lori Timor-Leste ne’e independénsia.

Labele Haluha Hili CNRT

Iha fatin hanesan, veteranu António da Costa ‘Derok Masin’ hateten, povu nia votu mak sei sai determinasaun atu lori moris di'ak, tanba ne’e labele haluha vota ba partidu CNRT.

Nune’e, veteranu Amaro Lasi Kati hateten, nia mai iha partidu CNRT, tanba de'it maun boot Kay Rala Xanana Gusmão. Nia mak sai inspiradór ba rai ne’e.

Ne’e duni, veteranu ne’e esklarese katak, hakarak hamutuk ho partidu CNRT ne’e la'ós ba pozisaun, maibé ho objetivu ida hamutuk ho Xanana Gusmão atu lori nasaun ne’e ba pás no estabilidade.

Entretantu iha kampaña ba dala 14 ne'ebé iha Munisípiu Baukau partidu balun mós hodi afilia ba partidu CNRT.

Partidu ne'ebé afilia ba CNRT mak hanesan partidu FRETILIN, partidu ASDT, Partidu Demokrátiku (PD), Partidu Sosiál Demokrata (PSD), Partidu Libertasaun Populár (PLP), partidu UNDERTIM, Partidu Republikanu (PR) no mós organizasaun Pro-Ativista/UNIJMO.

Tanba razaun partidu sira ne’e mai apoiu ne’e la'ós tanba partidu CNRT, maibé sira parte eis Comandante em Chefe FALINTIL, Kay Rala Xanana Gusmão hakarak atu hamutuk lori dezenvolvimentu nasaun ida ne’e bele hadi’a di'ak liu tan iha futuru.

Militante no simpatizante husi partidu FRETILIN, Agapito dos Reis hateten, ho afiliasaun mai iha partidu CNRT lori militante no simpatizante hamutuk 120, maibé la'ós atu sai militante partidu CNRT, hakarak apoiu maun boot Xanana Gusmão atu kaer ukun mesak hodi hala’o dezenvolvimentu iha rai ne’e.

Nune’e mos militante husi partidu FRETILIN Miguel Morais hateten, nia parte mai iha CNRT hakarak atu hamutuk ho Xanana atu bele hadi’a liu tan dezenvolvimentu, tanba Xanana mak iha kapasidade bele kria pás no estabilidade iha Timor-Leste.