Koordenadór ASEGURA, Filipe da Costa hateten, objetivu enkontru ne’e hodi deklara apoiu ba Prezidente Partidu libertasaun Populár (PLP) liu husi kampaña eleisaun lejizlativa.
ASEGURA durante ne’e hala'o atividade liu husi kampaña door to door hodi buka apoiante ba Taur Matan Ruak hodi bele manan iha eleisaun no sai primeiru ministru.
Enkontru ne’e apoiante husi grupu haat maka deklara hodi fó apoiu hanesan Grupu Juventude Bebonuk, Grupu OKST, Grupu UNICAL no Grupu ESDA (Estudante Dezenvolvimentu Agrikultura).
“Apoiante balun la’ós partidu PLP, maibé husi grupu asosiasaun”, dehan Filipe, iha Ai-Mutin, Komoro, Sábadu (8/7).
Tanba ne’e, maka organizasaun massa halibur grupu hodi apoiu TMR no liu husi forsa ne'ebé asegura atinji misaun polítika liberta povu husi hisik kosar ba moris di'ak.
Iha fatin hanesan, responsavel grupu husi OKST, Miguel de Jesus hatete, grupu ne’e iha membru 34 ne’ebé deklara ho fuan no laran momoos hakarak fó apoiu ba Taur Matan Ruak, tanba ne’e ho laran metin fiar katak Taur maka figura ne'ebé di'ak liu no merese kaer Governu.
Entretantu, responsavel apoiante husi grupu ESDA, Mariano Madeira Babo deklara, totál membru hamutuk 117 deklara apoiu ba maun boot Taur hodi ukun nasaun ne’e tanba ho prinsípiu ida katak hisik kosar ba moris di'ak.
Ami prontu ho esforsu-aan tomak hodi la’o iha territóriu Timor laran, nune’e bele habelar hatutan no haklaken manifestu polítika PLP nian ne'ebé ho prinsípiu hikis kosar ba moris di'ak.
Alende ne’e, responsavel Movimentu Juventude Loriku Populár, João Samanta Sousa hatete, husi grupu ne’e la’o durante semana rua nia laran rekolla ona dadus apoiante hamutuk tokon ualu ne'ebé rekolla husi munisípiu Lospalos, Baukau, Manatutu no Munisípiu Ermera liu husi atividade husi mini kampaña no door to door.
