Komitiva partidu FRETILIN ne’ebé kompostu husi Sekjer Mari Alkatiri, Adjuntu Sekjer, José Reis no Vise-Prezidente partidu FRETILIN, Aniceto Guterres halo vizita kortezia ba Rezidénsia Episkopál Baukau hodi halo enkontru ho Bispu Basílio, bainhira halo kampaña polítika iha Munisípiu Baukau, horisehik.

Hafoin reuniaun, Bispu Basílio hateten, hanesan belun ko’alia uitoan no halo avaliasaun kona-ba Estadu nasaun nian.

“Nia haree rasik lurón lorosa’e mai aat hela, hanesan Bispu fó lia menon ida ba (Sekjer FRETILIN) Alkatiri katak, sa’e karik ba governu keta haluha reinu lorosa’e”, dehan Don Basílio, iha Episkopál Baukau, horisehik.

Tuir Bispu nia haree, kampaña ladún rame, tanba iha partidu rua maka book-aan la’o tuun-sa'e hanesan partidu CNRT no FRETILIN. Partidu sira seluk ladún hatudu-aan no hakilar hanesan tempu sira uluk.

Maibé, Alkatiri deklara ba Amu Basílio katak mentalidade lideransa sira agora hahú muda ona, tanba partidu sira hakarak ‘fa’an’ programa ba povu, la’ós ho liafuan insulta malu.

Maski nune’e, tuir Bispu, ema la book iha eleisaun ne’e dala-ruma tanba partidu barak mak halo promesa, maibé ikus mai ukun la kumpre.

Ne'e duni, lideransa sira promete-promete povu la interese, karik ida ne’e maka populasaun nia ulun, entaun ne’e buat aat signifika populasaun Timor dezanima ho polítika seriu demais.

Entretantu, Don Basílio mós hanoin partidu hotu-hotu konsidera Igreja hanesan parseiru iha rai ne’e nia laran, hanoin katak to’o oras ne’e dezde primeiru governu buat ida bolu parseria no kolaborasaun ba Igreja ne’e nunka falta, tanba kontinua klima ida ne’ebé sivizmu nian.

Nune’e, Sekretáriu Jerál partidu FRETILIN, Mari Alkatiri hateten, polítika la'ós mai promete ba promete mai de'it, maibé polítika loos polítika ida ne’e lori planu ida ba dezenvolvimentu.

“Planu ida ita bele dehan fó osan uitoan, bele halo sasán barak no di’ak, la'ós fó osan barak halo sasán uitoan ne’e labele,” tenik nia.

Reuniaun ne’e hala’o iha Episkopál Baukau, hahú tuku 08:30 to’o 10:00, hodi troka impresaun ba-malu kona-ba dezenvolvimentu nasaun nian iha futuru.