Segundu Komandante PNTL Munisípiu Dili, Superintendente Asistente Euclides Belo hateten, área Munisípiu Dili nian PNTL idetifikadu ona fatin sira ne’ebé partidu polítiku sira tama sticker ho panfletu.
Nune’e, PNTL koordena ona ho parte Komisaun Nasionál Eleitorál (CNE) no STAE atu alerta ba partidu polítiku sira molok tama eleisaun lejizlativa tenke hamoos hotu sticker ho panfletu partidu polítiku sira nian.
“Bainhira kampaña partidu sira remata sira sira tenke hamoos hotu sticker sira ne’ebé ami idetifikadu ona”, dehan Euclides, iha Komandu PNTL Dili, horisehik.
Nia dehan, kompeténsia atu hamoos lema sticker no panfletu partidu polítiku, só brigada partidu polítiku sira maka hamoos atributu sira ne’ebé taka iha sinais tránzitu no fatin públiku.
PNTL Dili rasik lamenta ho brigada ho simpatizante partidu polítiku nian ne’ebé taka sticker iha ai-riin sinais tránzitu nian ne’ebé hamriik iha dalan públiku.
Biban ne’e, Euclides husu ba brigada partidu polítiku sira hotu atu iha loron 20 Jullu 2017, obrigatoriamente tenke hamoos ona atributu partidu polítiku sira nian.
Munisípiu Dili sei Lees Atributu Partidu iha Dalan Públiku
Entretantu, Administrasaun Munisípiu Dili sei organiza ekipa sira husi guarda munisipál atu lees hotu atributu partidu polítiku sira nian ne’ebé to’o oras ne’e barak maka taka iha fatin públiku.
Adjuntu Autoridade Munisipál Dili, José Smith hateten, kompeténsia ne’e Komisaun Nasionál ba Eleisaun (CNE) nian hodi haree situasaun ne’e, maibé iha Munisípiu Dili mós iha hela autoridade para atu kontrola ba buat sira ne’e.
Nia dehan, fatin públiku ne’e la’ós fatin para partidu polítiku sira taka fali atributu. Tanba ne’e, agora komesa organiza atu ba oin hodi haree ba panfletu partidu sira nian ne’ebé taka arbiru iha fatin públiku haruka hasai hotu.
“Ohin ami lees ona lubuk ida iha Largu-Lesidere no mós balun iha parede iha dalan ibun sira ne’e no ami sei hala’o mós ba to’o iha área tasi-tolu nian”, tenik nia.
Nia dehan, tenke konxiente katak depois sira bele mostra sira nia espanduk iha fatin ne’ebé de’it, maibé tenke iha konsiderasaun tanba munisípiu maka bele fó autorizasaun.
Ne’e duni, husi munisípiu Dili haree hetan partidu polítiku balun taka sira nia atributu partidu iha dala públiku ekipa operasaun sei hasai hotu.
Nia dehan, hahú aban ba oin, Munisípiu Dili hamutuk ho ekipa operasaun hamutuk ho PNTL atu kolabora oinsá bele hasai hotu atributu partidu nian taka iha dalan públiku sira ne’e no mós ba espanduk ne’ebé taka laiha konsiderasaun husi Administrasaun Munisipál Dili.
Antes ne’e, Adjuntu Autoridade Munisípiu Dili, José Smith hateten, aviza ona katak publisidade atu taka tenke husu lisensa ba Munisípiu Dili sira mak bele fó autorizasaun atu taka iha ne'ebé.
Nia esplika, publisidade ba kampaña partidu polítiku sira sei la kona koema, tanba sira la’ós halo atividade komersiante.
“Ita sei fó liberdade ba sira no fatin protokolu ita sei la fó autorizasaun”, dehan José, iha knaar fatin, Matadouru-Dili, horisehik.
Nia dehan, kona-ba dalan protokolu mak hanesan estátua Prezidente Nicolau Lobato mai to’o Palasiu Governu no tesik tan mai iha Sentru Konvensaun Dili (CCD). Fatin hirak ne’e bandu atu atu taka banner ka saida de'it.
