Realiza iha Munisípiu haat, nia esplika, tanba sei menus orsamentu ne’e mak atividade seidauk kobre iha teritóriu, nune’e agora realiza iha munisipíu haat.
Tuir Diretor Ezekutivu HAMNASA, Paul Vasconcelhos hatete, dadus VBJ iha TL aas tebes entaun objetivu husi aktividade ne’e, oinsá bele responde atu hakotu korente violensia ne’ebé mak sempre mosu iha komunidade sira iha área remotas no rurál.
“ita espera katak bele fó impaktu ba munisípiu sira seluk par bele hakotu bareira BVJ ne’e,” dehan Diretór Ezekutivu iha Suai Room Timor Plaza, Kuarta (06/03).
Nia esplika, atu hakotu bareira ne’e mak HAMNASA halo aprosimasaun iha área remotas ne’ebé to’o iha nível aldeia no suku.
Iha fatin hanesan, Diretór Interinu Misaun USAID, Mark White hatete, USAID orgullu tebes hodi fó ápoiu ba HAMNASA ne’ebé nu’udar ONG lokál liu husi implementasaun atividade halakon bareira, hodi reflete komitmentu atu lori ba oin inisiativa ne’ebé lidera husi lokál.
“Ha’u hakarak mós atu apresia Governu Timor-Leste ne’ebé adopta lei kontra Violénsia Bazeia ba Jéneru iha 2010, nune’e mós governu adpota planu nasionál anuál ba datoluk nia kona-ba VBJ nian iha 2022,” esplika nia.
Nia dehan, maske progresu signifikante sira ne’ebé halo ona no rekoñese katak iha servisu barak ne’ebé halo hodi bele elemina VBJ, tan ne’e USAID iha serteza katak banhira hamutuk bele prevene no redúz no bele evita VBJ iha TL.
Nia esplika, esperansa ne’ebé aktividade atu halo iha munisipiu haat ne’e bele mos hada’et ba iha munisipiu sira seluk hodi nune’e ba ema iha hirak ne’ebé iha komunidade la persiza hein de’it aktividade ne’e maibé fó kbiit ba an rasik.
Iha biban ne’e, Sekertáriu Estadu Igualdade (SEI), Elvina Sousa Carvalho apresia tebes ba ONG HAMNASA nia aktividade refere tanba iha misaun no vizaun no servisu importante sira SEI aliña tebes ba esforsu tomak ne’ebé halo.
Nia dehan, hakotu bareira, ba ema sira ne’ebé servisu direita na area ne’e hatene katak sei la fásil, iha sosiedade patriarka, komunidade patriaka ne’ebé forti tebes iha kultura no dominante mane nian la fásil atu bele servisu ba ida ne’e.
“VBJ nu’udar violénsia ida intoleránsia tanba kontra direitus umanu ema nian, maibé alein de kontra direitus umanu ema nian, nia mós hanesan VBJ ne’ebé hakanek dignidade humana feto no labarik feto sira.
Enkuantu, aktividade “halakon barreira, harii moris di’ak: resposta integradu Violénsia Bazeia ba Jéneru iha Timor-Leste” sei realiza iha munisípiu haat hanesan, Kovalima, Ermera, Likisa no Bobonaro.