Diretór Servisu Saúde Munisípiu Ermera, António de Deus Fátima hatete, relasiona ho postu no sentru saúde sira mamuk tanba pesoál saúde husi rejime sira-nia kontratu remata, maibé nafatin halo jestaun ba Munisípiu hodi apoia ba fasilidade saúde sira ne’ebé mamuk.
“Maibé atu hatete katak ne’e la signifika fasilidade hotu-hotu ita husik mamuk maibé ita nafatin halo jestaun mai iha munisípiu atu nune’e prepara rekursu nafatin, apoiu fasilidade saúde sira ne’ebé mamuk, atu nune’e fó nafatin atendimentu saúde públiku ba ita-nia komunidade sira,” dehan nia ba jornalista sira iha Timor Plaza, Kuarta (06/03).
Diretór afirma, tuir informasaun ne’ebé dehan fasilidade saude sira mamuk ne’e klaru, maibé Jerente saude munisípiu Ermera orienta ba Xefe Sentru Saúde halo nafatin jestaun atu nune’e fasilidade saúde sira mamuk kontinua halo tratamentu.
Nia salienta, tanba pesoal saude sira la sufisiente tanba ne’e dadaun ne’e halo ona rekrutamentu ba pesoál saude sira iha faze da-huluk hamutuk na’in 60 atu bele koresponde ba fasilidade saúde sira.
Entertantu, pesoál saúde ne’ebé dadauk ne’e halo atividade saúde nian iha Munisípiu Ermera enfermeiru hamutuk 104, Médiku 34, Parteira 57, no tékniku aliadu 263.
No pesoal saúde sira ne’ebé kontratu remata ona iha 31 Dezembru 2023 hamutuk 80 resin.