Diretora Jerál Planeamentu, Inkluzaun Polítika no Teknolojia-Ministériu Edukasaun, Odilia Ung Martin, fornese ba eskola ualo ne’ebé sai alvo ba programa ne’e, ne’ebé sei ajuda hasa’e esperinsia aprendizajem jeral kona-bá saneamentu báziku.
No estudante husi eskola ne’e hamtuk na’in 1,338 no manorin 46 mak benefisiariu ba saneamentu báziku ne’e.
“Ambiente ida ne'ebé moos no seguru importante atu motiva aprendizajen no atu permite labarik sira atu partisipa ho livre iha atividade sira ne'ebé sei ajuda sira nia dezenvolvimentu fíziku no kognitivu. Tanba ne'e ami simu ho laran-haksolok kolaborasaun boot ida-ne'e entre UNICEF, Governu Japaun no Ministériu, atu asegura katak fó prioridade ba fornese fasilidade sintina nian, ne'ebé sei kontribui ba fornesimentu aprendizajen ho kualidade ba labarik ida-idak.” dehan Sra. Odilia Ung Martin, liu-husi Komunikandu ne’ebé Online INDEPENDENTE asesu, Kuarta (04/09).
Diretóra ne’e afirma, Asesu ba bee-hemu ne’ebé seguru no fasilidade saneamentu ne’ebé adekuadu importante tebes ba manutensaun ambiente aprendizajen ne’ebé saudavel no suportivu no ajuda iha prevensaun malnutrisaun entre labarik no adolexente sira.
Tanba, tuir Relatóriu EMIS 2021 nian destaka katak liu pursentu 66 hosi eskola sira laiha sintina, ne'ebé tau sira iha risku boot liu atu hetan moras sira ne'ebé mai hosi bee.
Tanba ne’e, Liuhusi apoiu atuál ne'e hosi Governu Japaun, UNICEF harii fila-fali no reabilita sintina inkluzivu sira ho fasilidade fase-liman iha eskola sira ne'ebé sai alvu.
Embaixadór Japaun iha Timor-Leste Tetsuya Kimura hatete, Japaun kontinua fó ápoiu ba Timor-Leste iha area edukasau, nutirsaun no ijiene.
“Povu Japaun fo sintina sira ne’e ba eskola EBF Vairoque no ba estudante sira iha eskola ne’e. Ha’u hein katak labarik sira ne’e bele kontinua asesu ba ambiente ne’ebé seguru, ijiene iha sira nia eskola,” dehan Tetsuya Kimura.
Nia dehan, Atu komplementa reabilitasaun ba sintina sira iha eskola alvu sira, estudante no profesór sira hetan ona sensibilizasaun kona-ba prátika báziku sira saneamentu no ijiene nian, ne'ebé sei ajuda atu mantein padraun di'ak sira ba limpeza sintina sira nian.
Nue’e, UNICEF agradese ba Governu Japaun ba investimentu importante ida-ne'e, ne'ebé sei ajuda atu proteje saúde no dignidade estudante no profesór sira-nian no prevene moras sira ne'ebé relasiona ho BESI no iha nia fatin hamenus malnutrisaun, ne'ebé interfere ho dezenvolvimentu loloos labarik sira-nian.