Prezidente Repúblika, José Ramos Horta parabeniza governu Timor-Leste no Igreja Katólika bá preparativu sira hanesan altar santu ne’ebé Sua Santidade Papa Francisco sei utiliza hodi prezide misa.

"Parabens ba Governu, igreja no parte hotu-hotu ne'ebé iha tempu natón konsege organiza, mobiliza infrastrutura sira ne'ebé benefisia sidade nasaun tomak hodi simu didiak Amu Papa. Ha'u admira duni tanba baibain ita halo obra balun kleur tebes, ida ne'e Xina sira mo's lakonsege halo repidéz hanesan ita. Ha'u hakfodak hodi kalan ha'u ba Tasi-tolu admira tebes. Obra Bonita, boot elegante, ha'u rona tékniku ADN sira mak halo ninia konseitu. Observa fatin hotu-hotu tantu husi seguransa, sarani, parte mobiliza sarani, parte médiku la'o di'ak tebes," dehan PR Horta iha Aeroportu, kuarta (04/09).

Dom Virgílio Kardeál do Carmo da Silva hateten, hela loron hira de’it ona atu simu vizita Sua Santidade Papa Francisco, ne’e momentu ida sai momentu ksolok ba sarani hotu.

"Ho ita-nia praparativu sira ne'e hotu lori ita atu sente tebes duni ona ho entuziazmu boot hasoru viģariu Kristunia ne'ebé atu to'o dadaun ona mai,” dehan Kardeál.

Kardeál hodi Igreja Timor-Leste nia naran hakarak agradese bá Prezidente Repúblika, José Ramos Horta, Primeiru-Ministru, Kay Rala Xanana Gusmão no governante tomak ne’ebé servisu makaas hodi halo preparativu tomak hodi simu Sua Santidade Papa Francisco.

Líder igreja katólika Timor-Leste ne’e konvida sarani hotu-hotu kontinua reza hodi prepara a’an atu simu vigáriu Kristu nian.