Husi total ambulansia ne’e, ambulansia ualu prepara husi Ministeriu Saude, ambulansia rua nu’udar apoiu husi Governu Japaun, no ambulansia tolu husi Organizasaun Mundial Saude (OMS).

Iha Sesta (06/09), Primeiru Ministru, Kay Rala Xanana Gusmão, akompaña husi Ministra Saúde, Elias dos Reis Amaral, Vise Ministru Administrasaun Estatál, Jacinto Rigoberto de Deus, no Sekretáriu Estadu Komunikasaun Sosiál, Expedito Dias Ximenes, halo inspesaun ba ambulansia multi-funsaun iha Palásiu Governu.

PM Xanana agradese ba Governu Japaun no OMS ne’ebé tulun ona Governu Timor-Leste, liu-liu iha ámbitu vizita Sua Santidade Papa Francisco.

“Ambulánsia sira ne’e di’ak, tanba kompleta kedan ho fasilidade médiku nian. Lori Governu nia naran agradese bá WHO ho Governu Japaun apoia ita sein husu buat ida,” dehan Xanana hanesan  INDEPENDENTE sita husi komunikadu husi média Gabinete Primeiru Ministru, Sabadu (07/09).

Xefe Governu husu bá motorista sira atu kuidadu didi’ak ambulánsia no fasilidade sira ne’e, liu-liu iha ámbitu vizita Sua Santidade Papa Francisco, hodi fó atendimentu bá sarani sira ne’ebé sei partisipa misa iha Tasi-Tolu.

Ambulánsia multifunsan ne’e kompleta kedan ho fasilidade médiku hanesan kama, oksijéniu no sasán seluk tán.

Entertantu, durante inspesaun ne’e, ekipa mediku mos hatudu simulasaun balun ba utilizasaun ekipamentu bainhira mosu situasaun urijensia balun, liu-liu bainhira sarani sira hasoru problema saude.