Fatin tolu ne’ebé governu utiliza sai sentru média ba média nasionál no internasionál mak hanesan, Salaun Ministériu Transporte Komunikasaun (MTK), Hotél Hilton, no Tasi-tolu.
Sentru nasionál iha MTK ne’e, governu prepara ba Média nasionál no Media internasional ne’ebé destakadu, hodi halo kobertura ba vizita Papa Fransciso nian.
Nune’e, sentru média iha Ótel Hilton, governu prepara ba média internasionál sira ne’ebé rejistu, no média internasionál ne’ebé viajen hamutuk ho Papa Francisco.
Aleinde, iha sentru média iha Tasi-tolu, governu prepara ba média nasionál hanesan Rádiu Televizaun Timor-Leste (RTTL) no Grupu Média Nasionál (GMN) ne’ebé sei halo kobertura besik liu iha altar tasi-tolu.
Entretantyu, tuir oráriu, iha loron 09 fulan-setembru tinan ne’e, Papa Francisco hamutuk ho delegasaun sei voo husi Papua Nova Guiné mai Dili-Timor-Leste, no to’o iha Aeroportu Internasionál Nicolau Lobato, Comoro, iha tuku 14h10.
Hafoin Papa Francisco to'o iha aeroportu Komoro, Papa ho nia delegasaun sei simu husi Xefe Estadu no Governu no bispu sira iha Timor-Leste. Hafoin ida ne'e Papa sei ba deskansa iha Nunsiatura Apostólika iha Motael, Dili.
Iha tuku 18:00 lorokraik, Papa Francisco ne'ebé hanesan mós Xefe Estadu Vatikanu nian, sei ba iha Palásiu Prezidensiál Nicolau Lobato, Bairu Pite, hodi hala'o enkontru ho Prezidente Republika, José Ramos Horta. Iha oras hanesan, Primeiru-Ministru, Kay Rala Xanana Gusmão, sei hasoru malu ho ninia omólogu Kardinal Pietro Parolin, ne'ebé sei la'o durante minutu 20 nia laran.
Iha Palásiu Prezidensiál Nicolau Lobato, iha tuku 19h00 kalan ne'e, Papa Francisco sei lee ninia diskursu ne'ebé partisipa husi Xefe Governu no membru Governu da-sia (IX), sosiedade sivil, korpu diplomátiku no konvidadu sira seluk hafoin fila hikas ba Nunsiatura Apostolika Motael.
Iha loron tersa (10/09/24), iha tuku 08h45 dadeersan, Papa Francisco sei vizita labarik sira ema ho defisiénsia (moras autis) ne'ebé hela iha orfonatu Madre ALMA, Pantai Kelapa, Dili.
Iha tuku 09h30, Papa Fransico sei halo sorumutu ho bispu, padre, madre, diaknu, seminarista no katekista sira iha igreja Imaculda Conceição Katedrál Vila Verde, Dili.
Iha tuku 10h45 Papa Francisco sei halo sorumutu ho padre na'in-38 husi kongregasaun Jesuita iha Timor-Leste iha rezidensia Nunsiatura Apostolika iha Motael, Dili.
Iha tuku 16h30 lorokraik, Papa Francisco sei prezide misa solene iha Tasi-Tolu, misa ne'e la'o durante oras ida ho balun de'it, no sarani sira simu komuñaun kala la'o minutu 10 nia laran deit.
Iha kuarta, (11/09/24), iha tuku 09h30, Papa Francisco sei hala'o sorumutu no sei fó diskursu ba reprezentante juventude katólika husi dioseze Dili, Baucau no Maliana hamutuk 3.00.
Hafoin sorumutu ne'e, iha tuku 10h45, sei halo serimónia despedida iha aeroportu Internasionál Prezdidente Nisolau Lobato, Comoro, Dili, antes Papa Francisco ho delegasaun sei voo ba Singapura.
