Prezidente Autoridade Munisipiu Baukau, Veneranda Lemos Martins haktuir, arku ne'e simbóliza Baukau hanaran Uma Bo'ot Baukau ni’an.

Nia esplika, se Uma Bo'ot Baukau, Amu Papa Francisco la to'o Baukau, maibé bainhira liu husi arku nini’an ne'e Baukau oan sira sente dehan Amu Papa to’o Baukau, tanba simbólu ne'ebé lori iha arku ida-ne'e.

Kona-ba monta arku iha Estrada, nia haktuir, Munisípiu Baukau hetan orientasaun atu mai halo preparasaun ba arku ne'e iha loron 5 Setembru, nune’e loron 5 ekipa ida husi Munisípiu Baukau lideradu husi Xefe Lojístika mai halo preparativu ba arku.

Entaun, arku ne'e  halo ho arku espesiál ida ne'ebé identifika identidade Baukau nini’an.

“Entaun potensialidade saida mak iha Baukau ne'e ita sei aplika iha arku ne'e, entaun arku ne'e simbóliza Baukau hanaran Uma Bo'ot Baukau, se uma bo'ot Baukau Amu Papa Francisco la to'o Baukau mais bainhira liu husi arku nini’an ne'e, ita Baukau oan sira sente dehan Amu Papa to'o Baukau, tanba simbólu ne'ebé ita lori iha arku ida ne'e, ne'ebé arku ne'e orsida kalan parese hotu ona,” Dehan PAM Baukau, Veneranda Lemos, iha Mininistériu Transporte Komunikasaun (MTK), Domingu (08/09).

Aliende ida ne’e, sei harii mós uma adat identidade Baukau ninian hanesan simboliza.

Purntantu, perigriñu sira husi Baukau ne'e hamutuk 13.702, ohin ne'e perigriñu 150 mak mai uluk, tanba sira atu halo tebedai, orsida iha arku ninian ne'e forma hotu iha estrada ne'e halo tebedai.

“Foufoun ami simu informasaun katak iha perigriñu sira deskansa iha Akanunu, mas depois survey hotu fatin, Primeiru Ministru rasik harete Baukau muda fali mai iha Ajensia Dezenvolvimentu Nasionál (AND) ninia kotuk, entaun entre ADN ho Palásiu Prezidensiál ninia sorin,” Nia informa.

Nune’e mós, Baukau loke dapur iha akampamentu ne'e, maibé dapur ne'e loke ba hotu-hotu, hahan ne'ebé sei fa’an iha ne'ebá, sente hamlaha bele ba han.

Tuir observasaun Jornalista Online INDEPENDENTE iha terrenu katak arku Munisípiu Baukau monta husi ponte CPLP to'o iha Eskuadra Polísia Ai-mutin.