Inspesaun ne’ebé lidera husi Xefe Estadu Maiór Jenerál Forsa Armada, Tenente Jenerál Domingos Raul ‘Falur Rate Laek’ ho Komandante Jerál PNTL, Komisariu Jerál Polísia Henrique da Costa, ne’e atu haree preparasaun ikus husi parte seguransa iha pontu hirak ne’ebé Amu Papa sei hala’o ninia atividade durante iha Timor-Leste.
Iha inspeksaun dahuluk, Komando Forsa Tarefa Konjunta vizita Portu Dili hodi haree direita preparasaun polísia Maritima no Komponente Naval.
Husi Portu, Komando kontinua vizita ba Aeroportu Internasionál Prezidente Nicolau Lobato Komoro hodi haree preparasaun husi Unidade Patroillamentu Fronteira no membru F-FDTL destakadu asegura fatin entrada Papa Francisco no alta entidade international.
Hafoin ne’e, Komandu kontinua ba Unidade FALINTIL nia fatin hodi haree preparasaun ba seguransa iha Tasi Tolu.
Xefe Estadu Maiór Jenerál Forsa Armada, Tenente Jenerál Domingos Raul ‘Falur Rate Laek’ hatene, misaun forsa Tarefa Konjunta ne'e todan, maibé marka istória boot ba Timor-Leste nia luta ba independensia.
"Ita hotu hatene misaun ida todan ho estra-ordinariu, entaun ita estabelese forsa Tarefa Konjunta, ita envolve rekursu hotu PNTL ho F-FDTL, entaun ami rua mai halo inspesaun ida ne'e ho esperansa ida katak misaun ida ne'e todan imi hotu tenke servisu ho responsabilidade," apela Falur durante vizita Unidade FALINTIL iha Tasi Tolu, Domingu (08/09).
Atu asegura seguransa ba enventu istoriku ida ne'e envolve husi soldadu to'o komandante sira no pesoal lojistika to'o operasional hotu-hotu tenke sente buat todan no tenke preokupa halo servisu ho di'ak.
"Ita-boot sira ema treinadu no preparadu ba doutrina ida ne'e, misaun klaru, entaun iha ha'u-nia observasaun asegura seguransa ba eventu ida ne'e iha forsa rua maibé imi idaidak ho nia doutrina atu halibur hamutuk ida ne'e define ona iha orden preparasaun, imi tenke halao ida ne’e atu determina lori susesu ba eventu ida ne'e," katak nia.
Falur hein katak PNTL ho F-FDTL tenke halo koordensaun di'ak hodi bele halo susesu eventu vizita Amu Papa.
“Sai ema ida ho laran ida de'it no neon ida de'it mak ita bele sai susesu di'ak," katak nia.
