Sikalau ne’ebé uza iha serimonia simu Amu Papa ne’e foti husi Postu Administrativu Tutuala nian.
“Ami husi Munisípiu Lautém hamrik iha área Fatuhada nian hodi simu Sua Santidade Papa, no ami sei uza tais Sikalau husi Postu administrativu Tutuala nian mak tara ba Sua Santidade Papa," informa Mélio, iha Fatuhada, Domingo (08/09).
Komunidade ne’ebé hamriik iha estrada destinadu Munisípiu Lautém hamutuk na’in 150, ne'ebé reprezenta kada Postu Administrativu.
“Postu Administrativu ida reprezenta ema na’in 25,” dehan PAM ne’e.
Komunidade husi kada Postu Administrativu ne’ebé mai simu Amu Papa, nia dehan, sei uza idaidak ninia tais.
"Lautém iha Postu Administrativu neen no ami-nia tais mós la hanesan, entaun kada postu mai ho nia identidade rasik, ho nia tebedai rasik," nia dehan.
Enkuantu, sarani husi Munisípiu Lautém ne'ebé rejistadu atu partisipa iha misa solene iha Tasi Tolu hamutuk na’in 5.503. Enkuantu reprezentante joven husi Munisípiu Lautém ne'ebé sei hala’o enkontru ho Amu Papa iha Sentru Konvensaun Dili (CCD) hamutuk na’in 14, kada Postu Administrativu reprezenta husi joven na’in rua.
