PM Xanana ho membru governu balun halo limpeza iha área Fatuhada, hahú husi Tower Fatuhada Dili to'o dalan ba Aitarak laran.

Maske loron manas, maibé Xefe Governu hatudu nafatin vontade hodi dasa-rai no suru foer.

Sekretária Estadu ba Igualdade, Elvina Sousa Carvalho hatete, atu simu Papa Francisco presiza ema hotu servisu hamutuk hodi bele susesu tanba ne'e Xefe Governu ho liña ministeriál sira halo limpeza atu fatin ne’ebé Amu Papa liu sei moos no furak.

"Preparasaun infra-estrutura ne'ebé mak ita presiza, no presiza mós halo limpeza, ida ne'e importante tebes tanba kuandu buat hotu loos ona no feitu ona, entaun parte limpeza ne'e tenke, atu nune'e bele furak no prontu ita simu Papa Francisco," dehan Elvina bainhira akompaña PM Xanana halo limpeza, iha area Fatuhada, Domingo (08/09).

Membru governu ne’e apresia ho entusiasmu sarani sira hodi halo preparasaun simu vizita Amu Papa.

“Buat ne'ebé ha'u haree mak husi kada Munisípiu halo uma adat, infeita dalan públiku ho arku oioin, no sira mós tau kada identidade tais, kroa, belak, no seluk tan," nia dehan.

Elvina hein katak ho vizita Amu Papa ne’e sei hametin liu tan sarani Katolika Timor-Leste ninia fiar.

"Ha'u-nia esperansa mak Papa nia vizita hametin ita-nia fiar hanesan ema sarani Katólika," dehan nia.

Entretantu, aleinde SEI ne’ebé akompaña PM Xanana iha limpeza ne’e, iha mós membru governu seluk hanesan Ministra Solidariedade Sosiál no Inkluzaun, Veronica das Dores, Ministra Edukasaun, Dulce de Jesus Soares, Vise Ministra Negósiu Estranjeiru no Kooperasaun, Milena Rangel, no seluk tan.

Tuir observasaun jornalista iha terrenu, dalan portokolu hahú rotunda Komoro to’o Mandarin moos no infeita ona ho arku no kada munisipiu harii mós sira-nia fatin ba simu Amu Papa.