Diretór Nasionál Infraestrutura no Komunikasaun (DNIC), Ambrosio M.B Amaral dehan, oferese gigabyte rua ba média hodi fasilita média sira halo kobertura iha vizita Papa nian.
“Kapasidade ne’ebé dadauk ne’e iha purvolta 2 gigabyte garante de’it ba vizita sua santidade Amu Papa mai iha Timór, ba fatin lima (5) ka neen (6) ita halo jestaun” dehan Diretór Nasionál iha Mini Studiu INDEPENDENTE Kaikoli Dili, (07/09/24).
Kondisaun internet iha Timor-Leste ne’e, nia dehan, ema hotu hatene, dalaruma mate moris, ne’e sai ema hotu nia preokupasaun, maibé depende ba klima, hanesan iha tempu udan anin boot.
Tanba ne’e, Ministériu Transporte no Komunikasaun halo kontratu non komersiál ho Kompaña Telkomcel liuhosi border close hodi asegura koneksaun internet iha Timór.
“Entaun ha’u rasik mak horse’ik ba iha fronteira Batugadé lkansa fiu ne’e koneksaun iha tiha ona agora instalasaun perita atu garante ba iha média nasionál, internasionál nomós durante vizita Sua Santidade nian ita bele garante” nia fundamenta.
Konkesaun sira ne’e, nia dehan, liga ba pontu importante sira ne’ebé Papa Franscisco sei vizita mak hanesan, Aeroportu Timor-Leste, Palásiu Prezidente, Sentru Konvensaun Dili, Madre Alma, misa boot ne’ebé sei realiza iha Tasi-tolu.
“Hosi Tasi tolu mai iha Ótél Hilton mai RTTL rasik, ba aeroportu CCD sira ne’e ligasaun ne’ebé integradu” nia afirma.
Iha Timor-Leste, maske kondisaun internet ne’ebé limitadu, maibé ba vizita sua santidade Papa nian ne’e, sei asegura internet hosi transmisaun direta.
Minístru Transporte no Komunikasaun (MTK), Miguel Manetelu hatete, bainhira hala’o servísu másimu, Vatikanu fo konfirmasaun katak Amu Papa sei mai vizita Timor-Leste iha loron 9 to’o 11 fulan-Setembru.
“tanba ne’e, ita hahú reabilitasaun ba terminál VIP iha Aeroportu Prezidente Nicolau Lobatu, halo mós instalasaun ba run way lighting atu fasilita aviaun ruma atu tun iha kalan, ida ne’e mós ita monta hotu ona” dehan nia.
Aliende ne’e mós, iha parte konektividade atu fornese internet ba fatin sira ne’ebé indikadu hanesan, sentru ba média nian, no sentru ba misa nian.
“ita hatene katak, bainhira tun iha aeroportu tenke iha internet ne’ebé di’ak e depois iha rezidénsia vatikanu nian, iha RTTL iha Hilton no fatin misa Tasi-tolu sira ne’e mak durante ne’e halo hela prepasaun” nia hatutan.
Nia relata, informasaun hosi tékniku hanesan TIC Timor, ANC, no DNIK, preparsaun ba instalasaun konektividade atinje pursentu 90 resin atu fornese internet ba atividade durante loron tolu.
