Komisaun Organizadór Munisípiu Dili, Marcelino Pereira hateten,  preparasaun arku ne'e ho objetivu atu simu Amu Papa Francisco mai ne'ebé Munisípiu Dili arku ne'e husi Eskola 10 Dezembru ni'an to'o iha Ai-mutin baliza ho arku Ermera ni'an.

"Preparasaun arku ne'e ho objetivu atu simu Amu Papa Francisco ne'e, depois halo resesaun kulturál husi lia-na'in Dili Karketu, Mota-ain, no mós ita sei simu ho dansa kulturál husi grupu Rezeval sira ita prepara iha fatin ida ne'e, no ita nia  arku ba baliza to'o Munisípiu, Ermera ni'an iha Ai-mutin," Dehan Komisaun Organizadór Munisípiu Dili, Marcelino Pereira ba jornalista Online INDEPEDENTE, iha fatin arku Eskola 10 Dezembru Komoro, Domingu (08/09).

Nia dehan, Munisípiu Dili tuir planu iha na'in-150 mak sei iha arku ne'e uza kostume kulturál no mós dansa kulturál, maibé la limita ba komunidade sira ne'ebé iha Dili sira mós bele mai hamriik tama to'o iha Palásiu Prezidensia Repúblika nian.

Nia esplika, Autoridade Munisípiu Dili rasik arku ida ne'e reprezenta Munisipál Dili no mós iha Munisípiu Dili iha uma lisan lubuk.

Maibé, ida ne'e tau Jerál de'it Prezidente Autoridade Munisípiu Dili nia figura no mós iha Amu Papa Francisco nia figura katak uma lisan sira ne'e hotu iha Autoridade Munisípiu Dili ninia okos.

Tanba ne'e, tau tema jerál ne'e akumula hotu uma lisan iha Dili mós iha fatin ne'e lia-na'in sira mak sei simu.

"Maibé preparasaun arku ne'e rasik orsida lokraik finaliza ona, tanba aban ne'e simu de'it amu Papa Francisco ona," Nia relata.

Aliende, Munisípiu Dili nian joventude 14 pesoas sei partisipa iha dialógu ho Amu Papa Francisco iha CCD.

Iha fatin hanesan, Prezidente Autoridade Munisípiu Ermera, José Martinho Soares reforsa, preparasaun halo arku ne'e mobiliza ema tun mai halo loron rua ona.

Tanba, iha mudansa fali ne'e mak demora, maibé sukat hela aban oras tuku 2 ka tuku 3 Amu Papa Francisco liu husi fatin ne'e prontu ona, tanba ne'e kesi arku 300 metru.

"Arku Munisípiu Ermera ni'an ne'e rasik iha simbolizasaun, ami sei tau kafé reprezenta Munisípiu Ermera ne'ebé iha nia kultura rasik, iha nia espesifikasaun rasik la hanesan ho munisípiu seluk," Nia relata.

Purtantu, perigriñu Munisípiu Ermera sei hela iha Tibar Pertamina Divita nia sorin mai.

"Perigriñu sira husi Munisípiu Ermera rejistadu tiha ona 15 mill ital, atu dialógu ho Amu Papa iha CCD ne'e joven husi Munisípiu Ermera hamutuk 124," Nia haktuir.