Tuir lista, sarani ka peregrinu husi Munisipiu Vikeke na’in 6.802 mak sei partisipa misa istoriku ne’e.

Iha 8 Setembru ne’e, sarani husi Munisipiu Vikeke na’in 150 mak tama ona iha kapital Dili hodi halo preparasaun simu vizita Amu Papa.

Prezidente Autoridade Munisipiu Vikeke, Francisco Cruz Ximões Gonjaga Soares hatete, peregriñus sira husi Vikeke preparadu ona no balun konsentra uluk ona iha akantomentu iha suku Hera.

"Ami nia peregriñus sira ne'ebé mak sei partisipa misa iha Tasi Tolu ne'e rihun hitu maibé lista ne'ebé mak ami simu mak 6.802 itál mais ne'e seidauk sura ho komisaun organizadora ne'ebé mak marka prezensa iha ne'e, ne'ebé horisehik ne'e sira husi parte kulturál na’in 150 mak mai uluk ona iha ne'e," dehan Francisco ba jornalista INDEPENDENTE iha akantonamentu Hera, Domingu (08/09).

Nia dehan, peregrinu na’in 150 ne'ebé tama uluk ne'e balun prepara monta arku kulturál ne'ebé reprezenta Munisipiu Vikeke hodi hein simu Amu Papa iha dalan.

Tuir nia sarani Vikeke kontente tebes tanba vizitasaun ne'e nu'udar grasa ida.

"Sira kontente tanba bele dehan katak buat sira espera Amu Papa fila bele hetan bensaun ruma tanba ida ne'e istória nu'udar paiz independente ida."

Entretantu, orsamentu ne'ebé Autoridade Vikeke simu husi governu sentrál hodi prepara lojistika no transporta hamutuk rihun $40 ne'ebé fahe ba transporte no hahan.