Kordenador UNFPA iha Timor-Leste,  Ronny Lindstrom hateten, UNFPA serbisu hamutuk Ministeriu Saude, INS no parseiru implementadora hotu atu fortifika kapasidade setor saude nian, nune’e prevene no responde ba violensia bazeia ba jeneru.

“Tenke ativamente liu husi sensibilizasaun publika kona-ba impaktu saúde husi violensia ne’ebé baze ba saude no disponibilidade servisu sira ligadu ba atendimentu violensia bazeia ba jeneru, inklui servisu saude,” dehan Ronny Lindstrom iha salaun Katedral Vila-Verde, foin lalais.

Nia esplika, atu alkansa igualdade jeneru, presiza empoderamentu ba feto sira no realiza direitu ba saude sexual no reprodutiva ba feto no labarik sira ne’ebé agora krusial no kritiku tebes, nune’e bele atinji no alkansa dezenvolvimentu inkluzivu no sustentável.

“ Investe ba saude sexual no reprodutiva sei salva moris ka vida ema nian, avansa ka promove igualdade jeneru, hadia saude no bem-estar, ajuda feto no labarik feto sira atu asessu ba edukasaun ida ho kualidade, no hetan serbisu ida ne'ebe diak no dignu,” tenik nia.

Nia haktuir, UNFPA iha Timor-Leste komprometidu tebes atu aumenta no hasa’e disponibilidade no uzu serbisu saude sexual no reprodutiva ne'ebe integradu, inklu planeamentu familiar, saude maternal no HIV/SIDA ne'ebe responsivu ba jeneru no kumpri padraun direitu humanu nian ba kuidadu kualidade no asessu ho ekilibriu.