Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, kazu foun ne’ebé deteta ohin iha Munisipiu Baukau as liu kompara ho Munisipiu sira seluk.

Husi kazu detetadu 10 ne’e, iha Dili kazu 2, Baukau iha kazu 6, Bobonaro 1 no RAEOA iha kazu 1.

“Husi totál kazu detetadu foun ohin, kazu 4 ka 45% mak hatudu sintomas, kazu 2 ka 20% simu ona vasina doze kompletu no kazu 1 ka 10% simu ona vasina doze dahuluk,”dehan nia iha komunikadu, ne’ebé Online INDEPENDENTE asesu segunda ne’e.

Nune’e, kazu ativu ne’ebé baixa hela Izolamentu hamutuk na’in 549.

Ho nune’e, total komulativu kazu konfirmadu sura husi loron 21 fulan-Marsu tinan 2020 to’o loron 04 fulan-Outubru tinan 2021 hamutuk na’in 19.592.

Entretantu, husi horiseik (03/10) mai ohin teste PCR ne'ebé Laboratóriu Nasionál Saúde halo iha Dili hamutuk 67, kompostu husi, Contact tracing na’in 2, Random Screening na’in 1, Viájen sai husi serka sanitária husi Dili na’in 6, Viájen internasionál na’in 1no Follow up iha kuarentena na’in 57.

Enkuantu, teste PCR ne’ebé halo horiseik (03/10) iha Munisípiu sira seluk, RAEOA no HNGV hamutuk 130. Iha 04 fulan-Outubru tinan 2021, Izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu hamutuk na’in 25 kompostu husi kazu grave na’in 5, kazu moderadu na’in 15 no kazu leve na’in 5.