Enkuantu, orsametu ne’ebé Governu liu husi STAE aloka hodi sosa tinta eleitoral hamutuk montante rihun 360.
Diretór Jeral STAE, Acilino Manuel Branco hatete, tinta ne'e tuir akordu ne’ebe iha ho total rihun 10 garafas, Governu liu husi STAE mak tau osan ba iha UNDP, no UNDP mak prosesu akizisaun lori kompra, tinta ninia persentazem nitrat ne'e 25% ne’ebé kualidade ho padraun internasional.
“Ohin normalmente UNDP entrega ba iha STAE ho prezensa Governu nia hanesan Ministru Adminmitsaun Estatal (MAE) ho Komisaun Nasioanl ba Eleisaun (CNE) no reprezentante husi partidu politikus hotu ne'ebé lori, garantia katak material sira hotu liliu tinta ne'ebé mak ita atu uza iha eleisaun ne’e kualidade,” dehan Diretor iha Edifisiu STAE Vila-Verdi, Tersa (18/04).
Diretór esplika, Governu liu-husi STAE iha komitmentu ne’ebé boot hodi garante preparasaun sira ho masimu.
Maske ho tempu ne'ebé badak maibé ho esforsu parte hotu nia ikus mai bele hare katak preparasaun sira la'o ho di'ak ne'ebé atinji ona pursentu 90 hodi hasoru eleisaun ne'ebé sei akontese iha 21 Maiu.
“Ita hotu hatene katak iha prosesu eleisaun nesesita nesesidades barak tebes, aspetu lojistika ida hanesan ha'u hato'o ona katak governu disponibiliza kondisaun hotu-hotu, ne'ebé ita atravesa prosesu hotu liu, ita nia demokrasia ne'ebé naruk tebes agradese tanba 80% material sira iha ona Munisipiu,” katak nia.
Nune'e mós Diretór Jeral STAE hato'o agradese ba UNDP ne'ebé kontribui tan tinta eleitoral hodi bele fasilita iha eleisaun ne'ebe sei realiza iha fulan Maiu.
Iha fatin hanesan, Ministru MAE Miguel Pereira de Carvalho hatete, ohin hotu-hotu sai sasin ba orgaun administrasaun eleitoral hala'o sira nia funsaun tuir duni saida mak lei haruka.
“Iha publiku ha'u sempre dehan governu preparadu ona atu realiza eleisaun jeral iha tempu saida de'it ne'ebé estadu deside ona,” dehan Ministru.
Nia esplika, Governu sempre halo estudu liu STAE nu'udar mós orgaun administrsaun eleitoral ne'ebé iha autonomia administrativu finanseiru patrimonial hala'o ninia funsaun tekniku administrativu atu bele realiza eleisaun nee ho di'ak.
“Kontenti tebes ho kapasidade STAE nian bele halon preparsaun ho másimu konsege hatama ona material eleisaun nia mai Timor, no ikus liu ita simu tan tinta eleitoral ba eleisaun parlamentar," dehan nia.
Tanba ne'e lori governu nia naran hatoo agradese ba UNDP ho projetu CORE-TL ne'ebé sempre prontu hodi servisu hamutuk ho governu.
Iha biban ne'e mós, reprezentante UNDP iha TL Munhktuya Altangerel, senti onra tebes atu intrega ekipamentus importante ne’e ba STAE.
Tuir nia, tinta eleitoral ne’e uza ona iha nasaun barak hanesan meiu ida ne'ebé seguru liu atu asegura atividade eleisaun demokrátiku.
Partisipasaun eleisaun demokratiku iha TL mak makaas liu iha rejiaun ASEAN no iha mundu tomak ida ne'e hanesan ezemplu ida kona ba oinsa sidadaun sira apresia sira nia direitu ba votasau hanesan hakerek ona iha TL nia Konstituisaun.
Hatan ba pedidu husi Governu TL, UNDP sosa tinta eleitoral hahú kedas iha eleisaun jeral 2007, titan eleitoral ne'ebe propoin ba eleisaun parlamentar tuir mai iha kualidade aas ho padraun internasional ne'ebé prova ona iha leisaun presidensial 2022,” tenik nia.
Nia haktuir, sira hakarak enkoraje Tim,oroan hotu liliu votante dahuluk hanesan foinsae sira, Ema ho Difisiensia sira no ema hotu atu vota ho livre.
“Hau mós hakarak enkoraja ParPol sira hotu atu dezenvove plataforma no implementa politika ba jerasaun foun TL nian, atu nune'e Nasaun ne'e bele sai hanesan demokrasia ne'ebé orgullo iha komunidade no prospero no sai ezemplo ida ba mundu,” nia hakotu.
