Tuir Ministru Agrikultura Pekuária Peska no Floresta (MAPF), Marcos da Cruz hateten,  ajénsia UN iha Timor-Leste tau nafatin sira ninia preokupasaun ba setór Agrikultura atu oinsá bele apoiu no ajuda hodi hasa’e produsaun iha área pekuária, peska no floresta atu nune’e bele tulun planu governu nia ba meta ne’ebé iha ajuda mós ba komunidade sira hodi hadi’a sira-nia moris iha produsaun.

“Ohin ha’u ho Koordenadora Rezidénsia UN iha Timor-Leste, ami halo ona diskusaun oituan kona-ba kooperasaun servisu iha setór importante iha agrikultura nian ho intensaun atu ajuda governu hodi hasa’e produsaun iha rai laran hodi nune’e bele atinje meta ne’ebé governu planeia ona,” dehan Ministru Marcos ba jornalista sira iha Comoro, segunda (22/04).

Governu liu husi ministériu ninia planu importante liu maka molok tinan lima natar sira iha territóriu nasionál bele iha ona ektare rihun 50 ne’ebé ekivalente ba produsaun haree tenke iha ona 70%. Tanba ne’e maka UN iha antusiazmu tebes mai halo sorumutu ida ne’e ho hodi halo koordenasaun atu bele apoiu implementasaun servisu hodi reforsa setór importante sira ne’e.

Tuir nia sira sei implementa iha fatin ne’ebé la hanesan. Atu nune’e la bele hamosu konfuzaun iha baze. Tanba ne’e nia husu ona ba Koordenadora UN katak molok atu implementa presiza iha koordenasaun atu nune’e la bele xoke malu iha baze.

Iha fatin hanesan, koordenadora Rezidénsia UN iha Timor-Leste, Funmi Balogan afirma katak sira iha komitementu nafatin atu apoiu programa governu TL nian atu tulun MAPPF hasa’e produsaun iha rai laran.

Nia salienta, fundu ba apoiu agrikultura ne’e sira prevee ona maibé nia seidauk bele informa tanba maibé ho koordenasaun ne’ebé ko’alia ona sira sei haree fali parte tékniku bodi bele aloka ona fundus ba iha ne’ebá.

 Koordenadora Funmi dehan, área ida ne’e importante tebes atu muda atu tulun governu no ajuda mós komunidade no povu ninia moris liu-liu atu hetan nutrisaun di’ak hodi fó moris ba povu iha país ne’e. ne’e duni ho vizita ida ne’e atu reforsa liu tan koordenasaun sérviu hodi nune’e UN bele enkaixa ninia an iha implementasaun programa sira ne’ebé Ministériu trasa ona.

“Ita mai ko’alia ona ho ministru atu oinsá ita bele ajuda malu aselera programa sira iha área ne’ebé importante atu nune’e ita bele hasa’e liu tan produsaun iha rai laran. Atu povu nasaun ne’e bele hetan benefísiu boot hodi hadi’a nutrisaun di’ak ba sira nia moris,” tenik nia