Diretór Servisu Edukasaun Munisípiu Dili, Sabino da Costa, hatete, ligadu ba atribuisaun osan merenda ba tinan ne’e, ne’ebé territóriu implementa hahú horseik no iha Eskola Báziku Filiál (EBF) Faról hetan de’it osan loron lima ni’an ne’e, tanba depende ba númeru estudante sira.
“Eskola ne'ebé ho númeru estudante boot ne'e labele fó osan dala ida. atribuisaun osan ba loron hira-hira ne'e la'ós kestaun, maibé importante nia ezekusaun mak tenke to'o loron 130,” Dehan Diretór Servisu Edukasaun Munisipiu Dili, Sabino da Costa, iha knaar fatin, Komoro, Segunda (22/04).
Nia reforsa katak osan halo ona tranferénsia no tama ona iha kada eskola nia konta depende ba jestaun ne'e, tanba ne’e laiha problema kuandu atrubui hanesan ne’e.
Iha sorin seluk, Koordenadór Eskola Báziku Filiál (EBF), Aimutin, Rogério Soares, dehan, ohin eskola ne’e hahú implementa merenda eskolár.
“Osan tama ona no ohin ami hahú ona implementa merenda eskolár, osan ne’ebé simu, atende ba EBF ida-ne’e hamutuk $1.806 ba estudante 1.032,” Nia dehan.
Purtantu dadus estudante Munisípiu Dili ni’an ne'ebé mak jornál INDEPENDENTE asesu ho totál estudante husi edukasaun Pre-Eskolár no Ensinu Báziku tantu públiku no privadu hamutuk 49.262, ne'ebé kompostu hosi estudante Ensinu Báziku (EB) hamutuk na'in- 45.291, hosi EB Públiku na'in 38.478 ne'e mane 20.015 feto 18.463 no ensinu báziku privadu hamutuk na'in-6.813 ho mane 3.683 no feto 3.130.
Entretantu dadus estudante husi edukasaun Pre-Eskolár (EPE) hamutuk 3.971, kompostu husi Edukasaun Pre-Eskolár públiku na'in-1947 ho feto 999 no mane 948, nune'e mós husi edukasaun Pre-Eskolár Privadu hamutuk na'in-2021 ne'ebé kompostu husi mane 1.002 no feto 1.022.
Governu prevee Orsamentu Jerál Estadu (OJE) 2024 ba Ministériu Edukasaun (MAE), $54.409,666.
Ba programa kódigu 025, Desentralizasaun administrativa no poder lokál, ho nia osan $30.482,492. Programa ho kódigu 510, Funsionamentu no Dezenvolvimentu Instituisionál ho nia osan $20.842,366.
Programa kódigu 980, Inkluzaun Sosiál ho nia osan $46.800, programa kódigu A23, Toponímia no Organizasaun Urbana ho nia osan $1.590,744 no programa kódigu A24, Dezenvolvimentu Lokál ho nia osan $1.447,264.
