Diretór Nasionál Infraestrutura no Edukativu iha Ministériu Edukasaun (ME), Hélio Lopes hatete, semana oin Ministériu Edukasaun sei distribui kadeira ho meza hamutuk rihun 8 ba eskola 100-resin iha territóriu tomak.
“Kona ba kadeira ho meza ne'ebé dadaun ne'e rai iha armajen Ministériu Edukasaun nian ne'e hamutuk rihun 8, semana oin ita distribui ona, ita sei distribui ba eskola 100-resin iha teritóriu tomak ne'ebé presiza tebes, kadeira meza ne'e, ita sei distribui ba Ensinu Pre-eskolár to'o Ensinu sekundáriu,” dehan Diretór infrastrutura, Hélio, iha nia knaar fatin, Villa-Verde ,Segunda (22/04).
Daudaun ne'e, kadeira meza rai ona iha armajen Ministériu Edukasaun, falta dokumentu balun ne'ebé mak tenke konklui, maibé ida-ne'e iha ona diresaun lojístika nian no hein semana oin distribui de'it ona.
“Ami simu proposta barak husi eskola sira-neʼebé presiza, maibé ida-ne'e ami haree ba dadus verifikasaun husi ME ni’an. Ida-ne'ebé indika katak eskola balun presiza tebes kadeira ho meza no bele responde nesesidade kada eskola,” Nia informa.
Nia informa, Eskola bele halo jestaun, signifika kadeira ho meza ne'ebé iha bele uza tenke uza lai, atu labele hein de'it kadeira ho meza foun ne'ebé mak mai. Tanba ne'e mak Ministériu sei haree eskola ne'ebé mak presiza duni no eskola foun sira- ne'ebé mak sei ramata nia konstrusaun iha tempu badak sei distribui hotu.
Husi distribuisaun ne'e, eskola hot-hotu tenke garante katak kadeira ho meza neʼebé mak Ministériu fó tenke seguru no tenke hatene atu organiza kadeira meza hirak ne'e, bainhira forñese ona ba eskola sira-neʼebé presiza.
“Ba tinan kotuk, ita aloka orsamentu $700.000. Ba tinan ne'e purvolta $900.000, depois atu asegura hodi distribui nafatin ba iha sala-de-aula foun ne'ebé konstrui iha tinan ne'e, iha tinan oin, nune'e mós ba eskola sira-neʼebé menús kadeira ho meza,” Nia relata.
Nia afirma, karteira eskolar ne'e, sei distribui barak liu iha Eskola ensinu báziku, tanba estudante númeru Ensinu báziku mak barak liu Eskola ensinu sekundáriu no Pre-eskolár sira.
“Tanba ne'e mak ita masimiza ita-nia prioridade sira- ne'e iha nivél Ensinu báziku tantu infrastrutura no kadeira ho meza sira. Tanba númeru estudante Ensinu báziku ne'e kuaze rihun 200, entaun ita presiza kontinua fó apoiu materiál sira-ne'e, nune’e garante estudante hot-hotu iha kondisaun ida-ne'ebé di'ak, atu partisipa iha ensinu aprendizajem,” Nia afirma.
Tinan ida-ne'e, Governu garante katak sei la rezolve hotu, maibé pelu-menús minimiza ona problema ida estudante sira laiha kadeira ho meza ne'e.
“Ami garante katak ba oin estudante sira no ema hot-hotu sei la kestiona kona-ba kadeira no meza. Karik, iha kazu ruma iha Eskola ruma iha Timor laran, ita identifika katak la iha kadeira ho meza, ita sei responde imediatamente. Ha'u hanoin la'ós ita rezolve 100%, maibé pelu-menús ita redús ona problema ida-neʼebé kadeira-meza laiha ba estudante sira,” Nia haktuir.
Nia reforsa Katak kazu hirak ne'e neineik ba beibeik tinan lima ne'e, Governu kompremetidu atu rezolve situasaun ida kadeira meza ba estudante laiha.
Nune’e ba oin kadeira-meza ne'e Ministériu identifika hodi responde, karik to'o tinan lima ne'e ramata no tinan sira tuir mai problema menús kadeira-meza ne'e la haree ona iha eskola sira iha Timor-Leste.
Entretantu, proposta ne'ebé ME simu husi munisípiu hot-hotu esklui RAEOA, hatama pedidu husu karteira eskolár rihun 40 ho númeru ne'e boot, entaun ME sei re-verifika, tanba iha eskola balun di'ak hela, maibé lakohi uza no husu fali foun, iha fatin balun karteira eskolár iha, maibé rai tiha fali.
Iha sorin seluk, Diretór Eskola Ensinu Báziku Sentrál (EBC) 123 Manleuana, Feliciano Domingos Tilman, husu Governu presiza aumenta kadeira meza ba eskola refere, tanba volume estudante tinan ne'e aumenta.
“Kona-ba fasilidade Eskolár, tinan-tinan kadeira meza la to'o ba ita nia oan sira, tanba ho volume estudante ne'ebé barak, entaun sasán sira-ne'e barak mak estraga. Tanba ne'e, presiza Governu nia planu polítika ida, nune'e oinsá mak alarga ka aumenta, nune'e bele responde ba númeru estudante ne'ebé boot,” Nia hatete.
Purtantu totál estudante iha EBC Manleuana, iha tinan kotuk, 1.909, maibé ba tinan ida ne'e 1.920.
