Xefe Departamentu Deslokasaun Traballadór, Alarico Fernandes hatete, Kandidatu traballadór na'in 36 tuir teste skill ne'ebé fó husi kompañia Tsuneishi Group ne'ebé husi Japaun.
"Ohin ita hala'o teste ba kandidatu Japaun nian, sira na’in-36 ne'ebé iha pintór na'in 12 no soldadura 24," dehan Xefe Departamentu Deslokasaun Traballadór iha Sentru Formasaun Tibar, Tersa (23/04).
Nia dehan traballadór hirak ne'e tuir ona formasaun iha sentru formasaun sira, no traballadór sira ne'ebé tuir tuir teste nee husi sentru formasaun SENAE Bekora 9, Dom Bosco Komoro 15 no Sentru formasaun Tibar na'in 12.
Xefe Afirma, ba kandidatu hirak ne'e banhira tuir teste remata sira sei hein tan prosesu tuir mai hanesan tuir forasmasaun lian Japaun no teste Saude antes atu ba servisu.
Iha fatin hanesan, kandidatu Salvadór Conceição sente kontente tanba durante tinan ida tuir formasaun no ikus ema husi Japaun bele fó teste nia.
"Ba hau senti kontenti tebes tanba banhira halao kursus iha Bekora, ne'ebé mak formasaun remata ona, maibé iha formasaun ne'ebé profesor sira espalla mai katak vaga husi Japaun nia liliu konaba ba ami nia area soldadura nian," nia agradese.