Diretor Gabinete Relasaun Externa no Komunikasaun-APS Anacleto Caitano hatete, durante semana ida nia laran dezestre naturais akontese iha Munisipiu 11 ho tipo rua hanesan ahi-han uma no anin-sobu.

Munispiu ne'ebé afeita ba dezastre refere mak, Munispiu Baukau ahi-han uma rua (2) no anin-sobu uma sia (9), Ainaro ahi-han uma ida (1), Bobonaro anin-sobu uma tolu (3) ahi-han uma ida (1), Kovalima uma ida (1) no Dili, ahi-han komunidade nia uma ida (1).

Iha Munisipiu Ermera akontese anin-boot estagus komunidade nia uma hamutuk 18, Lautem Anin-sobu uma ida (1) no ahi-han uma ida (1), Manatuto ahi-han uma ida (1), Manufahi no Vikeke anin-sobu uma tolu (3).

“Kona ba apoia emerjensia ita iha nivél Munispal, iha komando munisipal nian servisu hamutuk ho parseiru no autoriedade lokál sira fo kedas ona ápoiu emerjensia,” dehan Xefe Gabinete ba Jornalista sira iha sala Konferensia APS Kaikoli, Segunda (09/10).

Enkuntu, totál dadus ne'ebé APS rejistu iha teritóriu laran tomak, hahú husi fulan-Janeiru to’o Outubro 2023 vítima ne'ebé afetada ba dezastre naturais hamutuk 2.472.

Husi númeru dadus dezastre naturais ne’e kompostu husi inundasaun afeita ba komunidade nia uma hamutuk 747, ahi-han uma 259, anin-sobu 848, rai-halai 563, tasi sae rua (2) no konflitu sosial sia (9).

Entertantu, ema ne'ebé mate tanba dezastre naturais Autoridade protesaun sivil nasionál rejistu hamutuk 30, kanek 10 no lakon nain tolu (3).

Ho nune'e, Autoriedadu Protesaun Sivil apela ba komunidade sira katak labele sunu rai arbiru atu nune'e  insendiu ne'ebé boot labele akontese iha Timor.