Hanoin ida ne’e mak lori foin-sa’e ida, Manuel da Costa Mesquita ho idade tinan 30, hodi kompete iha eleisaun ba orgaun suku ne’ebé sei realiza iha fulan Outubru ne’e.
Manuel moris iha Same iha 7 Janeiru 1993. Oan husi Celestino da Costa no Maria da Costa Almeida. Manuel iha maun-alin na'in 6, maibé ida fila hikas ona ba Maromak nia kadunan.
Manuel hahú ninia estudu iha nivel primaria iha eskola São Miguel Arcanjo husi tinan 2001 to’o 2006. Kontinua ba Pre-sekundariu iha Eskola Númeru 1 Diligensia Same husi tinan 2007-2009, no kontinua ba Sekundariu iha eskola Dom Boa Ventura 1912 Same husi tinan 2010-2012.
Objetivu ba nia hakarak kandidata aan hodi kompete iha eleisaun ba orgaun suku Fatukahi, tanba hakarak atu dezenvolve di’ak liu tan Fatukahi ne’ebé sai nu’udar sentru ba postu Fatuberliu.
"Entaun presiza iha lider joven ne'ebé vizionariu, iha koñesimentu natoon no fasil halo adaptasaun iha prosesu, liu-liu iha era ne'ebé modernu ho teknolojia ne'ebé avansadu tebes," dehan nia.
Programa ne'ebé sai ninia planu prinsipal ho karater urjensia atu implementa bainhira hetan konfiansa maka hadi'a sistema hodi aplika boa governasaun.
Seluk mak infra-estrutura bazika hanesan eletrisidade, bee-moos, lixu no harii haris-fatin publiku ba vizitante sira bainhira ba vizita semiteriu publiku iha suku Fatukahi.
Programa ne'ebé ho karater permanente mak aposta ba iha programa governu nian, liu-liu sei implementa atividade ho naran ‘Moos no Furak’. Ba programa ne’e, kada Sesta sei organiza komunidade hamoos lixu iha kada aldeia ne'ebé partensia ba suku Fatukahi hodi garante Fatukahi sai suku ne’ebé moos no saudavel.
Iha setor agrikultura no turizmu, Manuel dehan, nia sei buka meius atu komunika ho parte kompetente atu apoiu hodi hasa'e produsaun no rekolla reseita liu husi sitiu turizmu komunitariu ne'ebé eziste iha suku refere.
Durante ne’e, Manuel fó ona mós kontribuisuan balun ba suku Fatukahi. Foin-sa’e ne’e loke ona sentru formasaun lian Inglesh ba juventude ho naran AHHA Educations-SOLS iha suku Mausiga.
Planu seluk ne'ebé nia iha mak bainhira eleitu ba xefe suku, sei loke aan hodi rona ideia husi parte hotu-hotu, liu-liu igreja, estadu no komunidade sira nune’e bainhira programa ka orientasaun ne'ebé mai husi governu sentral parte hotu-hotu iha koñesimentu ona atu ninia implementasaun bele la'o ho di'ak.
"Ita sei lori suku ida nakloke no halo parseria ho ajensia no emprezariu sira hodi dudu prosesu dezenvolvimentu suku bele la'o di'ak, no tulun hakbi'it ekonomia populasaun iha Fatukahi," nia promete.
