Ferlio moris iha Bekora, iha 15 Outubru 1980. Oan dahitu husi maun-alin na'in 13, oan husi João Ferreira (matebian) no Francisca Parada (matebian).

Ferlio hahú estudu iha eskola primaria Sabaraka Laran husi tinan 1990 to’o 1995. Kontinua ba Pre-sekundariu iha SMP 6 Bekora, iha tinan 1996 to’o 1998, no kontinua iha SMEA Bekora husi tinan 1999 to’o 2001.

Hafoin termina estudu iha nivel sekundariu, Ferlio la kontinua ba iha nivel universidade tanba situasaun ne’ebé defisil no mós fator ekonomia ne'ebé la sufisiente.

Maski la kontinua ninia estudu iha nivel universitariu, maibé Ferlio la baruk atu aprende. Tanba espiritu ne'ebé nunka rende, iha tinan 2016, komunidade sira iha aldeia Bee-Mutin, Suku Bekora, Postu Administrativu Kristu Rei, Munisipiu Dili, fó konfiansa ba nia hodi sai nu’udar Xefe Aldeia.

Ho pozisaun ne'ebé nia to'o ohin, nia sente direta situasaun ne'ebé povu enfrenta, tanba ne'e nia konsiente aan katak, atu hadi'a povu ninia kondisaun labele de'it iha nivel aldeia maibé tenke hakat ba iha nivel ne'ebé ninia area kobertura luan.

Ho esperiensia ne'ebé nia iha nu'udar xefe aldeia durante ne'e, jerasaun foun ne’e deside atu kandidata an iha eleisaun orgaun suku ne'ebé sei realiza iha 28 Outubru.

Bainhira hetan fiar hodi sai Xefe Suku, Ferlio hatete, programa prinsipal ne’ebé sei halo mak hamutuk ho komunidade Bekora prepara kondisaun ba juventude sira.

Kondisaun ne'ebé prepara ba juventude sira mak kria formasaun ba juventude sira, no promove talentu joven sira nian, liu-liu iha area desportu.

Aleinde ne’e, nu’udar Xefe Suku Ferlio sei esforsu hodi komunika ho parte relevante sira atu ajuda, hadi'a no responde nesesidade povu nian.

“Programa seluk mak bainhira eleitu sei lori suku Bekora sai suku ne'ebé kompetitivu, hodi sai suku ne'ebé mós diferente iha aspetu ba atendimentu no lori suku ne'e ba progresu,” dehan nia.

Bainhira programa hirak ne’e implementa, nia fiar katak sei hadi'a kondisaun suku nian ne'ebé sei presiza atensaun masimu husi autoridade lokal sira.