Xefe Relasaun Externa no Komunikasaun iha APC, Cesário da Silva hatete, husi dezastre naturais ne’ebé akontese ho tipu dezastre sira mak hanesan, anin sobu uma, rai halai no insediu urbanu.
“Iha semana ida nia laran, tipu dezastre naturais ne’ebé akontese aas liu mak hanesan, ani sobu uma hamutuk 119, rai halai estraga uma lima no insediu hamutuk neen, ho total uma kain ne’ebé afeitadu iha semana ida nia laran hamutuk 130” dehan nia liu husi Konferensia Imprensa iha Sala Komunikasaun, APC, Kaikoli, Dili, (05/02/24).
Nia hatutan, uma-kain 130 ne’ebé afeitadu ba dezastre naturais mai husi Munisípiu Aileu, Ainaro, Baukau, Bobonaro, Kovalima, Ermera, Lautem, Likisa, Manufahi, Vikeke inklui RAEOA.
Entretantu, ba uma-kain afeitadu sira, oras ne'e dadaun APC munisipiu hamutuk ho parseiru sira fó ona apoiu emerjensia.
Enkuantu, ekipa husi Autoridade Protesaun Sivil mós sei halo verifikasaun ba dadus uma-kain sira ne’e hodi identifika uma ne’ebé mak hetan estragus husi aat kaman, naton no aat total.
