‘‘MoU ne’ebé mak ohin SEFOPE ho UNDP asina importante tebes ba futuru, ami no atividade sira ne’e relevantes ho servisu Diresaun Nasionál sira nian,” dehan Sekretáriu Estadu Formasaun Profisionál no Empregu, Rogério Araújo Mendonça, iha salaun SEFOPE, Kaikoli, Dili, (05/02/24).
Nia hatutan, Diresaun sira ne’ebé nia servisu relavente ho UNDP mak hanesan Diresaun Nasionál Empregu Estrajeiru, iha ne’ebé mak iha departamentu ida Re-Intregasaun nian, Diresaun Nasionál Empregu, ne’ebé koalia konaba akonsellamentu, expozisaun kareira, serbisu ka empregu temporariu ne’ebé mak bele fó serbisu ba komunidade sira.
“Programa re-intregasaun mak hanesan ita-nia traballadór ne’ebé serbisu iha rai-liur sira fila mai Timor-Leste, oinsá mak ita bele lori fila ita-nia traballladór ba hetan empregu ne’ebé mak la hanesan iha rai liur,” afirma nia.
Iha fatin hanesan, Reprezentante UNDP iha Timor-Leste, Katyna Arguenta hateten, sira iha esperansa husi asina akordu ne’e, hodi bele atinje objetivu ba programa ida-ne’e, seluk mak sira hakarak dezenvolvimentu sustentavel ida ne’ebé mak Governu agora hala’o hela.
“Esperansa ne’ebé mak ita hakarak husi asina akordu ida ohin ne’e mak, oinsa atu atinji objetivu ba iha programa ida-ne’e, parte seluk mak ita atinji ita nia objetivu dezenvolvimentu sustentavel ne’ebé maka ita-nia Governu rasik opta ba oin," dehan nia
“Durante implementasaun programa ita-nia joven kuaze besik atus ne’en resin ne’ebe mak benefisiarius husi pograma ida ne’e, atus ne’en ne’e konklui husi sira ne’ebé mak tuir formasaun no mós ba sira ne’ebé hetan formasaun oi-oin." Tenik Representante UNDP
Nia informa liutan katak, formasaun empreendedorizmu oinsá mak formandu sira bele hetan abilidade empreendedor hodi bele halo sira nia negosiu, formasaun seluk kona ba oinsa mak hasa’e sira nia abilidade hodi buka servisu, liu husi programa estajiu, akonsellamentu kareira ho atividade sira seluk. Jovem sira ne’ebé durante tuir formasaun, kuaze lubuk ida mak halao ona sira-nia negósiu ho fundus ne’ebé sira hetan kria servisu ba sira-nia an no mós ema seluk.
Orsamentu ne'ebé sei utiliza hodi finansia ba Projeitu (YEES) total $8,120,947, No Projeitu CIReP, total $5,308,82, Paseiru Implementador ne'ebé benefisia hodi implementa programa ne'e mak hanesan, IADE, SEFOPE, MSA, Centru Juventude no Brigde International.
