Sekretáriu Estadu Toponomia no Organizasaun Urbana, Germano Santa Brites Dias hatete, tanba okupa espasu públiku ne’e mak ohin mai harahun tiha hodi kompanha halo servisu ho diak.
“Atu fo hatene deit katak fatin ida ne’e fatin espasu públiku ida iha agora dadaun kompanha halao hela nia servisu, eskola S Miguel la’os problema foun ida ba IX Governu, problema ne’e mai kedas husi oitavo Govern uke labele rezolve ho diretór eskola rasik,” dehan nia ba jornalista iha Comoro, segunda (05/02)
Nia afirma, tanba la konsege rezolve iha Oitavo Governu tanba ne’e iha IX Governu ne’e, mak husu ba diretór S. Miguel atu koopera ho Governu hodi harahun de’it mak uma ninin ne’ebé okupa espasu públiku maibé sei la harahun tomak eskola S. Miguel de Arcanjo.
“Kuaze metro walu (8) para nune’e bele fo fatin para kompaña ne’e bele kontinua Estrada ne’e mai rotunda Nicolau lobato por kauza husi eskola S. Miguel” nia haktuir.
Tanba eskola S. Miguel ne’ebé okupa fatin difikulta kompanha hala’o nia servisu paradu tanba ne’e mak ohin deside atu harahum metru 8 hodi nune’e aselera servisu refere finaliza lalais.

Antes ne’e Governu halo ona notifikasaunba eskola S. Miguel iha fulan Dezembru tinan 2023 no Janeiru iha tinan 2024, tuir nia governu hakarak koopera ho eskola S. Miguel maibé diretór eskola ladún koopera.
“Diretór Terras Propriedas prepara ona kondisaun balun fó ona iha eskola SEROJA, signifika katak tenke muda estudante balun ba iha ne’abá para ida ne’e bele fó ona ita para halo servisu, tanba ida ne’e ba públiku, Timor laran tomak, ba povu hotu, tanba úniku dala ita mai haka’as aan para bele sobu dadaun husi oin nian, hakarak ka lakohi tenke sobu,” dehan nia.

Iha fatin hanesan Diretór Eskola S. Miguel, Armindo Crisna Caetano hateten, lamenta ho governu nia planu sobu eskola S. Miguel tanba konsidera urjente.

“Sira nia tratamentu ba asuntu projetu afeitadu eskola S. Miguel ne’e hanesan urjentemente, sira la iha planu ida ne’ebé diak, ne’e primeiru, segundu ohin sira mai sobu ne’e mós la iha karta koñesimentu ruma ba ami para ami prepara estudante sira nia kondisaun molok atu sobu, terseiru ha’u hakarak inform aba media katak, iha sesta feira foin liu ba semana kotuk ne’e ha’u asina karta konkordánsia ho governu atu sobu ida ne’e, maibé to’o agora osan duit ida mós la tama konta bankaria” nia esklarese.

Nia mós rekoñese katak, karta notifikasaun tama ona maibé osan indiminizasaun to’o agora seidauk tama ba iha rekening Eskola S. Miguel nian, to’o Governu sobu eskola mós osan kompensasaun seidauk tama iha konta bankaria.

Diretór konsidera Governu manipula informasaun falsu ba kona-ba transferénsia osan maibé sira hakarak manipula hodi sobu eskola ka instituisaun edukasaun hanesan S. Miguel Arcanjo.