Inspetor Jerál AIFAESA, Ernesto Monteiro hatete, ida sei planu maibé iha mós aprovasaun orsamentu iha serbisu deskonsentradu bá iha Munisípiu haat nune'e bele kontrola serbisu iha terrenu.
"Ha'u atu espala tan katak AIFAESA bá tinan ida ne'e iha mós aprovasaun orsamentu iha serbisu deskonsentradu bá iha Munisípiu haat hanesan iha Munisípiu Baukau, Kovalima, Bobonaru no mós RAEOA sei halo rekrutamentu bá iha Funsionariu na'in 5 kada Munisipíu," dehan nia hafoin lansamentu bá fos ne'ebé importadu husi Kambodia iha Portu Tibar, Kinta (01/02).
Nia afirma, maibé ida ne'e sei iha planu nia laran, maibé tinan ida ne'e hakarak ka lakohi tenke halo rekrutamentu para bele serbisu besik liu ba iha publiku liu-liu ba Munisipíu haat ne'e.
"Tanba saida mak ha'u hili Munisipíu haat ne'e tanba iha leste neeba Bakau bele kobre Manatuto, Lautém no Vikeke, bá Oeste neeba Kovalima no Bobonaru tanba iha fronteira inklui RAEOA, kestaun ida ne'e mak ami hanesan desizaun ne'ebé ke ami foti," dehan nia.
Tuir nia, pelumenus Munisipíu haat ne'e uluk, depois espera katak tuir fila-fali mai bele mós planu bá iha Munisípiu sira seluk nune'e bele garante serbisu ba iha futuru.
Entretantu, Funsionariu AIFAESA sira ne'ebé kontratadu la'ós hamenus, ate adata seidauk halo kontratu, signifika seidauk hamenus no seidauk kontratu, maibé ne'e desizaun Ministru nian atu hamenus balu ka atu tama fila-fali ka depois mak sei komunika bá malu.
"Konserteza kontratadu ne'ebé kuandu termina nia serbisu, lo'os ne'e implika tebes, tanba kestaun ohin loron ha'u mesak iha neeba ha'u labele halo serbisu, ami na'in haat de'it ne'e ami labele halo serbisu bu'at ruma," nia afirma.
Kestaun ida ne'e mak implika duni iha medias sosiál ema hotu mós preokupa hotu tanba kestaun ema ne'ebé ke iha terrenu tenke iha tekniku espesifiku ne'ebé iha ona nune'e bele saida. Komu seidauk kontratu bá sira Instituisaun ida ne'e seidauk bele halao nia knar hanesan baibain.
"Ha'u atu hato'o iha ne'e katak hahu 1 Janeiru mai to'o 1 Fevereiru, iha Janeiru tomak ne'e funsionamentu iha AIFAESA seidauk bele la'o tanba Funsionariu sira ne kontratadu hotu kuaze 118 Pessoa, so ema na'in haat de'it inklui mós ha'u naran saida kontrolu iha terrenu," nia salienta.
Funsionariu AIFAESA repete tan dala ida katak hamutuk 123 Pessoa iha tinan kotuk, maibé 118 Pessoa ka 96% funsionariu, entaun kuandu iha 31 Dezembru 2023 sira termina sira nia kontratu.
"Ne'ebé ate adata seidauk iha desizaun para bele kontinua sira nia kontratu, mais ha'u atu hato'o seidauk to'o desizaun tanba kestaun ami AIFAESA tutela bá iha Ministériu Kordenador Asuntu Ekonómiku, ne'ebé Ministru rasik tanba nia saúde agora sei iha estranjeiru, maibé iha esperansa katak ha'u mós komumika ona nia xefe Gabinete iha tempu badak sei fila hikas mai," nia afirma.
Ho nune'e bele iha esperansa katak bele fó kontratu bá iha Funsionariu sira ne'ebé iha esperiensia serbisu iha AIFAESA durante tinan barak nia laran, balun iha 2017 no balun iha 2019 signifika balun tinan 5 no balun tinan 7 ona iha esperiénsia bele kontrata hikas fali atu bele halao fali knar hanesan inspesaun espetiva bá AIFAESA.
