Enkuantu, vitima dezastre naturais hirak ne’e, mai husi Munisipiu Ainaru, Bobonaro, Lautem, Líkisa, Manatutu, Manufahi no Vikeke.
Diretór Gabineti Relasaun Externa no Komunikasaun (GREK-APC) Anacleto Caitano, hatete, durante anin boot akontese iha semana ida nia laran estraga komunidade lubuk ida nia uma iha munisipiu hitu (7).
"Agora dadaun uma ne'ebé anin estragus hamutuk 223, akontesimentu ida ne'e uma barak estragus tanba anin boot,” dehan nia ba Online INDEPENDENTE, iha salaun reuniaun APC Kaikoli, Dili, segunda ne’e (09/01).
Diretór hatutan, iha etapa dahuluk, hafoin akontesimentu Autoriedade Protesaun Sivil iha komando munisipal sira imediata fó kedas apoiu emerjensia ba vitima dezastre naturais sira hanesan hahan no mós nesesidade bázika sira seluk.
Entertantu, ba etapa daruak nian, ekipa konjunta husi Autoriedade Protesaun Sivil sei halo identifikasaun no halo verifikasaun ba uma 223 ne'ebé hetan hafoin apoiu tan material ruma.
"Ba iha etapa daruak ekipa konjunta sei identika lai uma sira ne'ebé anin estragu hodi verifika fila fali, no ida ne’ebé mak tama iha kategori aat total, aat naton ka aat kaman ne'ebé ita bolu dehan apoiu rekoperasaun ka hadia fila fali hafoin bele apoiu tan,”tenik nia.
Iha biban ne’e mós protesaun sivil liu husi Gabineti Relasaun Externa no Komunikasaun husu ba populasaun hotu iha teritoriu laran tomak atu halo viajem ba munisipiu karik la'o ho kuidadu, tana tuir informasaun ne'ebé kordensaun ho diresaun nasional meterolòjika katak ba oin iha posibilidade akontese tan anin boot no udan.
