"Timor-Leste ho Repúblika Koreia Súl relasaun bilaterál metin loos desde uluk kedas tempu interfet, ho matebian Prezidente Kim de Zum ne'ebé ha'u koñese di'ak, ha'u mak propoin nia ba prémiu Nobel da Pás, nia manán iha Koreia partisipa ho forsa Nepal iha Timor INTERFET depois aumenta relasaun bilaterál," dehan PR Horta, iha Palasiu Prezidensiál, Bairru-Pité, Sábadu (7/1).

Nia dehan, Koreia simpatia makaas ho Timor-Leste tanba primeiru sira demokrásia, segundu sira-nia istória rasik, povu Koreia ne'e hatene terus saida okupasaun estranjeiru, sira uluk mós kiak liu Timor-Leste.

Maibé ho sira nia orgullu nu'udar nasaun disiplina, sira nia domin ba sira nia rai rasik sai agora poténsia ekonómika indústria mordenu iha mundu, dala barak ita ko'alia bei-beik hanesan milagre ekonómiku Xina maibé Korea uluk kedas antes rona milagre ekonómiku Xina ka iha ne'ebé-ne'ebé Korea du Súl hahú ho Prezidente Park depois mai to'o demokrásia.

"Ha'u koñese Korea du Súl di'ak Embaixadór tinan rua ho balun iha Timor Leste relasaun di'ak loos ho ha'u, líder sira hotu-hotu sira halo atividade kulturál barak atu hatudu realidade Korea nian relasaun Korea Timor Leste," hatete nia.

Nia hatete, iha rai balun halo dadaun hanesan Vatikanu bainhira Embaixadór ida serve to'o tinan rua sira sempre halo rekoñesimetu, nune'e Xefe Estadu hahú ne'e kedas iha primeiru mandatu tanba sira mai reprezenta sira nia rain, no sira ida-idak halo komprimisiu buka hametin relasaun ho Timor Leste.

Entaun bainhira sira fila buat ida ne'ebé Timor Leste bele halo nu'udar estadu, governu halo kondekorasaun ba sira nia servisu, no sira sei lembra sempre ida ne'e.

"Embaixadór reprezenta nia nasaun, estadu no reprezenta Xefe Estadu ne'eduni ha'u uluk kedas Ministru Negósiu Estranjeiru no Kooperasaun (MNEK) ha'u nunka falta resensaun ruma ne'ebé Embaixada ruma oferese, tanba ne'e hatudu amizade respeitu ba rai ne'e, la'ós tanba ha'u hakarak laiha buat ida atu halo ha'u hakarak entertein lae respeitu simu konvite husi Embaixadór ida nia reprezenta nia Xefe Estadu mak ha'u sempre halo bainhira sira fila ita tau medalla meritu ba sira," dehan nia.

Iha fatin hanesan Embaixadór Korea do Súl iha Timor Leste, King Jeong Ho agradese tebe-tebes ba Prezidente Repúblika José Ramos Horta ne'ebé hamutuk durante fulan 20 resin nia laran iha Timor di'ak tomak ne'ebé halo ba nia.

"Uluk nanain ha'u hakarak agradese tebe-tebes ba Prezidente Repúblika ne'ebé ami na'in rua hamutuk durante fulan 20 resin nia laran iha Timor Leste di'ak tomak ne'ebé Xefe Estadu halo ba ha'u obrigadu barak ba ida ne'e. Mezmu tinan rua ha'u la halo buat barak maibé agradese tebes bele oferese medalla ida ne'e ba ha'u no onrda tebes ba ha'u, dejezu nafatin prosperiedade entre Timor Leste no Korea ba futuru," haktuir nia.

Tanba ne'e Embaixadór ne'e fiar tebes ho Xefe Estadu ninia lideransa ho nasaun Timor ne'ebé sei joven iha tempu tinan 20 mai oin Timor Leste sei sai nasaun ne'ebé mais dezenvolvidu liu tan liu-liu Governu Korea hakarak hato'o komitmentu nafatin apoiu Timor Leste ninia adezaun ba ASEAN apoiu saida de'it Timor Leste presija husi Korea, Korea nafatin prontu atu apoia iha area saida de'it.

Fizikamente Embaixadór ne'e bele husik hela Timor Leste, maibé ninia fuan sei iha nafatin iha Timor Leste, no Embaixadór ne'e fila ba Korea mós sei sai hanesan boa vontade Embaixadór iha Korea nafatin promove Timor Leste iha Korea atu nune'e bele hametin nafatin lasu entre Timor ho Korea iha futuru.

"Tanba ne'e ha'u nia susesor sei to'o iha Timor tempu badak, ha'u fiar katak nia sei servisu maka'as liu tan atu mantein nafatin kooperasaun ne'ebé iha ona, sei servisu hamutuk ho Prezidente Repúblika nune'e lori apoiu sira husi Korea atu dezenvolve Timor Leste. Ikus liu nafatin ha'u reza ba Nai Maromak fó bensaun ba Timor Leste no ba saúde Xefe Estadu nian, ba Timor Leste nia prosperiedade ba futuru," tenik nia.