Diretór Gabineti Relasaun Externa no Komunikasaun Anacleto Caitano hatete, hahú loron 9 to'o 15 fulan-Maiu APC rejistu dezastra naturais husi munisipiu ualo (8).
Munisipiu Ualo mak hanesan, Baukau, Vikeke, Ainaro, Lautem, Covalima, Manatutu, Dili no Covalima.
Enkuantu husi dezastre ne’e iha tipo haat mak hanesan rai-halai, ahi-han, ani-sobu no inundasaun.
"Husi Munisipiu ualo ne'e ekipa APC foin fó apoiu emerjensia ba Manatutu ho Vikeke, maibé Munisipiu neen seluk seidauk fó apoiu tanba sei halo verifikasaun," dehan Diretor iha Salaun APC Kaikoli, Segunda (15/05).
Diretór Gabineti Relasaun Externa esplika, iha Munisipiu Ainaro Postu Ainaro Villa, anin boot estragus komunidade nia uma hamutuk tolu, iha Postu Maubisse, akontese rai halai estraga uma rua.
Iha Munisipiu Dili, Postu Dom Aleixo Suku Comoro Aldeia Fomento-1, ahi han komunidade nia uma ida.
Enkuantu, iha Municipiu Covalima, Postu Fohorem, iha anin boot estraga komunidade nia uma ida no rai halai estraga uma lima.
Aleinde, iha Munisipiu Lautem, akontese anin sobu estraga komunidade nia uma neen no rai halai estragus uma tolu no iha Munisipiu Manatutu, anin boot estragus uma ida.
Iha Munisipiu Baukau, Postu Quelicai Suku Lacoliu Aldeia Uaule, anin boot estragus Komunidade nia uma ida. Postu Baucau Villa, Suku Wailili Aldeia Waibubu, Iha ahi han uma ida.
Postu Baguia, Suku Defawasi Aldeia Uarou, lha loron 09 maio 2023, anin boot estraga komunidade nia uma rua.
Entretantu, iha Munisipiu Viqueque, uma sia mak hetan estragus.
Munisipiu Manufahi, Postu Alas Suku Uma Berloik Aldeia Colocau, iha loron 08 maio 2023, inundasaun estraga komunidade nia uma hamutuk 103 no iha Postu Same Suku Betano anin boot estraga mós komunidade nia uma rua.
