Totál to’o iha inísiu fulan-maiu 2023, Ministériu Finansas halo ona levantamentu osan husi Fundu Minarai ho montante $490 milhões husi totál $1,3 biliões ne’ebé mak Parlamentu Nasionál aprova ona liuhusi Lei Orsamentu Jerál Estadu 2023.
“Segundu levantamentu adisionál ho montante $190 milhões ne’e, Ita halo bazeia ba previzaun fluxu kaixa ba fulan rua tuir-mai ne’ebé mak aprezenta husi Diresaun-Jerál Tezouru, Ministériu Finansas,” dehan Ministru Finansas, Rui Augusto Gomes ne'ebé online INDEPENDENTE sita.
Ministru hatete, to’o iha fulan-Maiu 2023, totál levantamentu $490 milhões ne’e mós sei menus husi limite Rendimentu Sustentável Estimadu husi Fundu Minarai ba tinan 2023 no kumpre artigu 4, Lei númeru 15/2022, 21 Dezembru konaba Orsamentu Jerál Estadu 2023.”
Antes ne’e, iha inísiu fulan-fevereiru 2023, Ministériu Finansas halo ona primeiru levantamentu ho montante $300 milhões husi Fundu Minarai hodi finansia Orsamentu Jerál Estadu 2023.
To'o iha loron 12 fulan-maiu, ezekusaun reál OJE 2023 ba Governo hotu em termos nominál atinji ona $389 milhões husi totál orsamentu $2,16 biliões ne’ebé mak Parlamentu Nasionál aprova.
Bazeia ba relatóriu ikus Fundu Minarai nian husi Banku Sentrál Timor-Leste, to'o iha loron 31 fulan-marsu 2023, kapitál Fundu Minarai hamutuk $17,8 biliões.
Iha primeiru trimestre 2023, Fundu Minarai hahú ho dezempeñu ida ne’ebé pozitivu. Fundu hetan rendimentu investimentu la-inklui despesas hamutuk $697,1 milhões no totál retornu investimentu trimestrál mak 3,56% inklui kustu no despesa sira seluk.
Kapitál Fundu iha aumentu $418 milhões husi $17,4 biliões iha Dezembru 2022. Nune’e balansu Fundu iha fim Marsu 2023, sa’e ba $17,8 biliões.
Daudaun ne’e Ministériu Finansas implementa Reforma Fiskál no Jestaun Finansas Públikas, mellora ezekusaun orsamentál nomós jere konta fiskál hodi prezerva rekursu sira ne’ebé mak akumuladu iha Fundu Minarai.
Atu redus risku investimentu Fundu Minarai, iha Jullu 2021, Oitavu Governu Konstitusionál introdús ona Polítika Investimentu ka Segmentasaun Fundu Minarai ba iha Karteira Likidez (Liquidity Portfolio) no Karteira Kresimentu (Growth Portfolio).
Karteira Likidez atu garantia katak durante tinan tolu tuir-mai, Governu iha osan atu finansia Orsamentu Jerál Estadu (OJE).
Enkuantu restu husi Fundu, sei investe iha Karteira Kresimentu liuhusi investe filafali iha asoens nomós iha títulus atu nune’e nia retornu aban bainrua bele uza filafali hodi finansia asset likidu. Ida-ne’e hanesan abordajen ida ne’ebé foun no konsistente ho boa prátika iha indústria ne’e rasik.
Iha primeiru trimestre 2023, halo ona rebalanseamentu (top up) ba Karteira Likidez husi Karteira Kresimentu hodi garantia Governu nia levantamentu ba tinan tolu tuir-mai hodi finansia OJE.
Iha fim Marsu 2023, investimentu iha Karteira Likidez hamutuk $3,2 biliões. Enkuantu $13,9 biliões investe iha Karteira Kresimentu.
