Husi numeru ne’e, mai husi munisipiu haat hanesan, Munisipiu Lautem, Baukau, Manatuto no Kovalima.

"So UKL ne'ebé seidauk tama iha faze ida implementasaun ne'e mak iha uma hamutuk 19,”dehan nia ba Online INDEPENDENTE, iha knar fatin Vila-Verde, segunda foin lalais (04/04).

Nia hatutan, uma 19 ne’ebé seidauk implementa, ho razaun tanba iha suku balun kondisaun estrada ladiak no laiha dalan atu asesu. Ida ne’e sai difikudade ba ekipa sira atu lori ekipamentus ba to’o iha suku refere.

Nia esplika, iha munisipiu Baukau, iha suku ida naran Soba ne’e seidauk implementa UKL, tanba distansia do’ok tebes no mós atu asesu ba estrada laiha.

Iha fali munisipiu Lautem, iha suku Wairoke ne’e mós seidauk implementa, tanba nia aldeia alvu ba implementasaun do’ok tebes no la iha asesu dalan.

Aleinde, Munisipiu Manatuto, iha Postu Adminitrativu Laklubar, iha suku tolu hafoin inundasaun iha loron 4 abril 2021, ne’ebé mai ho volume bo’ot entaun difulta dalan ba suku refere aat total no labele atu asesu.

Enkuantu, iha Munisipiu Kovalima, iha suku ida ne’ebé do’ok tebes no asesu da dalan ne’e laiha.

Tanba ne’e, nia dehan, UKL 19 ne'ebé seidauk implementa ne'e, PNDS sei halo fali dezeñu foun ida espesifiku, atu implementa ba deit iha suku sira ne'ebé mak seidauk implementa iha faze dahuluk nian. Tanba, hakarak ka lakohi iha suku sira tenke hetan hotu.

Ho nune’e, parte tekniku sei halo hela survei ida atu bele haree hodi dezeña fali UKL ne'e nia modelu, atu bele tau kustu hodi bele tranposrta sasan sira ne'e ba iha suku ne'ebé seidauk asesu ba UKL ne'e.

"Ita sei halo kontratu ho ema, haruka ema atu lalin de'it sasan sira ne'e, tanba sasan sira ne'e kareta labele lori tama ba iha suku sira ne'ebé kondisaun estrada aat, entaun persija tau osan hodi bele mobiliza materia sira, atu bele lori to'o ba iha foho leten sira hodi halo kontrusaun,"haktuir nia.

Entretantu, tuir dadus implementasaun ba UKL faze dahuluk 2021 nian, iha teritoriu laran tomak hamutuk 1.254 ho total orsamentu hamutuk tokon U$25.