Tuir, Sekretáriu Estadu Protesaun Sivil, Joaquim Gusmão, hatete, komunidade sira ne’ebé afeitadu ba inundasaun iha 4 abril 2021, iha teritoriu laran tomak ne’e hamutuk rihun 31.

Enkuantu, ba vitima sira ne’ebé lakon total sira nia hela fatin, nune’e, presiza atu fó apoiu material rekuperasaun mak ne’e hamutuk rihun 5.

Maibé governu apoiu uluk ona material rekuparasaun ba familia vitima hamutuk rihun 3.

Ho nune’e, vitima dezastre naturais iha 4 abril 2021 ne'ebé seidauk hetan apoiu rekuperasaun ne’e hamutuk rihun 2. Ida ne’e ona prosesu atu apoiu, tanba apoiu rekuperasaun ne’e tama mós iha planu Orsamentu Jeral Estadu 2022 nian.

Nia hatutan, ba komunidade sira ne'ebé afeitadu, governu apoiu ona emerjensia liu-liu aihan hanesan nesesidade bazika no mós material uma laran nian balun.

"Vitima balun ne'ebé seidauk hetan apoiu ne'e tama ba iha Osamentu Jeral Estadu (OJE) 2022 nian, agora dadaun prosesu hela atu ita bele fó apoiu lalais ba komunidade sira," dehan nia ba Jornalista sira hafoin partisipa iha serimonia reforsa mekanismu no Gestaun risku dezatre naturais iha TL, iha Ótel Timor, Kolmera, tersa ne’e (05/04).

Ba familia vitima 65 ne’ebé dadauk ne’e sei hela iha kost, Governante ne’e dehan, sira sei  servisu hamutuk nafatin ho Prezidente Autoridade Munisipiu Dili no mós Ministeriu Administrasaun Estatal (MAE) atu bele halo halo aproximasaun ba vitima hirak ne’e.

"Ita iha opsaun rua, ba vitima ne'ebé agora hela nafatin iha kost,  ida sira ba harii fali uma iha fatin ne'ebé seguru ita kontinua fó apoiu ba sira no karik vitima sira hakarak fila ba munisipiu ita fó apoiu,  haruka sira ba munisipiu,”tenik nia.

Nune’e, nia dehna, Governu kontinua fó apoiu ba sira, maibé tenke iha limitasaun tempu, no to'o ona tempu sira tenke fila ba iha munisipiu, tanba Governu labele sustenta hanesan ne'e bebeik to'o hotu, tanba dezastre naturais ema hotu la espera.

“Ita halo nafatin halo negosiasaun para bele muda sira ba fatin ne'ebé mak seguru ou muda sira ba munisipiu,"haktuir nia.

Tanba ne’e, Governu husu nafatin ba komunidade sira atu labele halo uma iha fatin sira ne’ebé risku ba inundasaun.

Entretantu, iha loron 4 abril 2022, Governu TL liu SEPS selebra misa agradesementu tinan ida no fó omenajen ba vitima dezastre naturais 4 abril 2021 ne'ebé lakon vida.