Tuir Diretór Nasional Empregu Exterior, Filomeno Soares, hatete, SEFOPE asina ona deklarasaun ho familia traballadór sira.
Nunee, hodi sai hanesan komitmentu ida katak, familia, liu-liu inan-aman sira pronto ona husik sira nia oan ba servisu iha rai liur.
“Traballadór na’in 59 ne’e, aranka ba Korea do Sul, iha loron 7 fulan-abril tinan ne’e,”dehan nia iha Ótel Timor Lodge, Komoro, tersa ne’e (05/04).
Nia hatutan, traballador hirak ne’e, sei ba servisu iha area fabrika no peskas.
Enkuantu, husi traballadór na’in 59 ne’e, iha mós traballadór tuan na’in lima, ne’ebé antes ne’e sira servisu ona area peskas no fabrika nian.
Nia haktuir, tuir dadus husi fulan janeiru to’o marsu 2021, traballadór hamutuk rihun 3.014 mak ba servisu ona iha Korea do Sul, kompostu husi area fabrika na’in 200.
Entretantu, Reprezentante traballadór Arlindo dos Santos, hatete, nia sente kontenti tanba hetan oportunidade ne’ebé diak hodi ba servisu iha Korea do Sul.
“Ha’u nia objetivu ba servisu iha ema nia rai mak atu hodi buka moris atu bele sustenta uma laran no ajuda alin sira nia estudu,”dehan nia.
