Tuir Embaixadór Australia iha Timor-Leste, William Costello, hatete, Governu Australia hakarak apoiu TL hodi tau matan ba inan isin rua no labarik sira no mós atu reduz má-nutrisaun.
Aleinde, Governu Australia mós servisu hamutuk ho Ministeriu Solidariedade Sosial no Inkluzaun atu haree ba asuntu igualidade jéneru nian, liu-liu violensia kontra feto no labarik feto no mós protesaun ba ema ho defisiensia sira.
“Ohin, ami inkontru koalia kona ba implementasaun programa Bolsa da Mãe, nunee, ami mós fó apoiu dolar amerikanu tokon U$5 ba programa refere,”dehan nia ba jornalista sira iha salaun MSSI, Kaikoli, segunda nee (04/04).
Nia hatutan, Governu Australia sei servisu hamutuk ho MSSI atu asegura inan isin rua no labarik sira bele hetan hotu Bolsa da Mãe ida ne’e.
Nia akresenta, programa ida ne’e sei hahú uluk iha Munisipiu tolu (3) hanesan, Munisipiu Ainaro, Bobonaro, no Rejiaun Administrativa Espesial Oecese Ambeno (RAEOA).
Enkuantu, nia dehan, bainhira iha munisipiu tolu ne’e iha mudansa ba implementasaun programa refere, mak MSSI sei implementa tan bá munisipiu sira seluk.
Entretantu, molok nee, Diretór Diresaun Nasional Asistensia Sosial (DNAS), Lukas Tois, hatete, programa Bolsa da Mãe Jerasaun Foun ne’e, sei oferese subsidiu ba inan isin rua no bebe ho idade zero to’o labarik tinan neen (6), inklui mós ho labarik defisiensia sira.
Enkuantu, objetivu husi programa ne’e mak, atu redus insidensia husi numeru pobreza no gravidade husi pobreza atu hadia saúde ou nutrisaun inan no labarik sira liu-liu ba labarik sira ne’ebé iha primaria infansia.
Atu nunee, bele reforsa sira hodi hetan hahan nutritivu durante iha periodu infansia.
Nia esplika, ba labarik sira neebé hafoin inan partus mai hahú husi tinan zero to’o tinan neen, sei hetan dolar amerikanu $20
Nia dehan, subsidiu ho valor dolar amerikanu $20 ne'e, bainhira iha kazu adepsesional ruma, labarik ida moris mai ho kondisaun normal sei hetan direitu durante faze primeiru to'o tinan tolu no kontinua ba tinan neen.
Maibe ba labarik balun moris ho kondisaun defisensia sei hetan adisional dolar amerikanu $10 no hamutuk $30 durante periodu infansia tinan tolu to'o tinan ne'en. Aleinde, ba inan isin rua sira neebé gravida sei hetan subsidiu dolar amerikanu $15 kada fulan.
