Deolindo hatete, formasaun tekniku ne’e importante atu nune’e jornalista ne’ebé halo kobertura hatene no kompriende temu ne’ebé uza.

“Ita-boot sira presiza iha tan formasaun tékniku liu tan ne'ebé uluk ha'u sempre hato'o tiha ona katak liu-liu ba kobertura iha area ne'ebé liga ho lei, bainhira imi reportajen ne'e uza termus tékniku sira ne'e uza forma ne'ebé loos atu eduka povu sira atu kompriende uza termus sira tuir buat ne'ebé loos.”

“Tanba bainhira jornalista sira uza termus ne'ebé la loos entaun orsida ba to'o inan-aman sira ne'ebé la kompriende ne'e sira la kompriende liu tan, ne'ebé ida ne'e ha'u hanoin KI organiza buat ida ne'e ho media tomak atu bele kompriende, ida ne'e presiza envolve tekniku sira ne'ebé servisu iha area justisa atu fó formasaun ne'ebé adekuadu ba ita-boot sira,” dehan Deolindo hafoin enkontru semanal ho Prezidente Repúblika, Francisco Guterres Lú Olo, iha palasiu prezidensial Bairo-pite, foin lalais.

Tanba, nia dehan, dala-barak jornalista sira-nia reportajen kapa’as maibé ladun uza termus ho forma ne’ebé loloos.

"Ha'u fó ezemplu kiik-oan de'it, bainhira ita halo reportajen julgamentu Tribunál Dili ne'e ita-boot sira dehan ‘juis aplika pena suspensaun ba arguidu A’, ne'e la loos, pena ne'e laiha pena suspensaun, pena ne'e iha pena prizaun no iha pena multa sira ne'e mak iha, agora suspensaun ne'e efeitu ne'ebé juis bainhira nia deside katak kondena arguidu ida ne'e ho pena tinan rua, maibé suspende nia ezekusaun ne'e tinan haat, ne'ebé buat sira ne'e hotu mak ita-boot sira-nia preparasaun di'ak liu tan," katak nia.

Iha oportunidade ne’e, Prezidente TR mós hato'o votus parabéns ba Jornál INDEPENDENTE ne’ebé eziste ona durante tinan 11.

"Parabéns ba Jornál INDEPENDENTE ne'ebé eziste iha tempu naruk ona, depois ho rezisténsia ne'ebé sufisiente ona ita-boot sira halo buat ne'ebé di'ak liu tan, tanba ita-boot sira, media ne'e mak sai matan no tilun ba demokrasia, entaun ita-boot sira tenke servisu ne'ebé neutru no fornese informasaun ne'ebé di'ak liu tan ba públiku, ne'e la'ós dehan ita sura, presiza halo di'ak liu tan tanba asesu ita-nia komunidade ba média ne'e agora barak liu no boot liu tan duké hanesan uluk," dehan nia.

Uluk, nia hatutan, ema la preokupa atu haree média, maibé agora ema-nia preokupasaun boot liu tan.

“Tanba ida ne'e mak ita-boot sira presiza hato'o buat ne'ebé di'ak liu tan atu ema akompaña prosesu tomak,” katak nia.