PNDS Verifika Hela Dadus Benifisiariu UKL Faze Daruak Featured

By Agostino Gama Abril 06, 2022 343
Diretóra Programa Nasional Dezemvolvimentu Suku, Claudina Soares Pinto. Foto:Agostino/INDEPENDENTE Diretóra Programa Nasional Dezemvolvimentu Suku, Claudina Soares Pinto. Foto:Agostino/INDEPENDENTE

DILI: Diretóra Programa Nasional Dezemvolvimentu Suku, Claudina Soares Pinto, hatete, benifisiariu ba Uma Kbiit La’ek faze daruak, parte tekniku rekolla hotu ona, maibé sei haree fila fali nia prosesu.

Tanba, iha prekupasaun barak husi komunidade sira balun kestiona kona ba prosesu identifikasaun benefisiáriu UKL ne'e la justu no la tuir matan dalan.

"Entaun lista final ne'e ha'u bele dehan katak, ami hetan tiha ona iha fulan marsu nia laran, maibé lista benefisiáriu ha'u seidauk publika tanba tenke halo lai prosesu ida, atu bele garante katak ne'e tuir mata dalan ka lae?,”dehan nia ba Online INDEPENDENTE iha knar fatin, Vila-Verde, segunda foin lalais (04/04).

Ho nune’e, nia hatutan, bainhira parte PNDS deteta katak, prosesu verifikasaun dadus ne’e mak la tuir mata dalan, ekipa sira sei tun fila-fali, hamutuk ho komunidade no xefe suku sira atu bele haree fali lista refere.

Tanba nia, dehan, PNDS nia hakarak program UKL ne’e skomunidade sira mak sei sai alvu ba iha UKL ne’e.

"Ami rejista preokupasaun husi komunidade sira, tanba ekipa sei tun imediata atu bele hare fila-fali prosesu re-verifikasaun benefisiáriu kada suku sira," tenik nia.

Nia fó ezemplo hanesan, iha semana kotuk ekipa PNDS halo vizita ba iha suku balun no verifikasaun tanba preokupasaun mai husi komunidade sira katak prosesu verifikasaun ne'e ladun justu entaun ekipa sira tenke re-verifika fali hodi bele implementa UKL ne'e.

Enkuantu, tuir nia, garante katak prosesu verifikasaun ne’e tuir duni mata dalan.

Molok nee, Ministru Administrasaun Estatal (MAE) Miguel Pereira Carvalho, hateten, implementasaun UKL ba tinan ne'e liu-husi parlamentu nasional Aprova ona OJE 2022 ho montante hamutuk dolar amerikanu tokon U$71.

Tanba ne'e,  MAE sei halo konstrui UKL hamutuk rihun 4000 iha faze daruak nian, iha teritoriu laran tomak. Nune’e, kada suku ida sei hetan Uma Kbiit Laek 10.

Nia dehan, progressu ba implementasaun UKL, benefisiáriu identifika ona, tanba sei iha eleisaun prezidensial, entaun bainhira hotu mak sei implementa UKL ne'e.

"Ha'u simu lista reklamasaun balu kona-ba benefisiáriu sira, tanba iha benefisiáriu balun la tuir kriteria, entaun ida ne'e persija halo revia fila-fali hafoin bele implementa UKL ne'e," dehan nia foin lalais.

Rate this item
(0 votes)

Independente Digital TV