Enkuantu, númeru kazu dengue ne'ebé dadauk ativu sa'e ba 3.959, husi númeru ne'e nafatin Dili mak rezista ás liu ho kazu 2.636, tuir Baukau 251, Manatuto ho kazu 172, Manufahi kazu 160, Lautem ho kazu 153, Kovalima  126, Likísa 109,  Ermera ho kazu 107, Aileu 87,  Vikeke 64, Ainaru 45, Bobonaru  kazu 44, no RAEOA ho kazu 5.

“Husi dadus ne'e ita haree, kazu dengue kontinua sa'e beibeik ho númeru ne'ebé ás, no dengue mós kontinua oho labarik sira, ne'ebé iha loron 5 Abríl ne'e, labarik na'in rua mate tan, no kazu mate hamutuk ona 50,” informa MS, liu husi karta komunikandu ne'ebé Online INDEPENDENTE asesu, kuarta ne’e (06/04).

Enkuantu, Munisipiu sanolu resin ida, ne'ebé  dadauk  rezita ona kazu mate mak, Dili rezista ona kazu 27, tuir Kovalima kazu 7, Ermera 4, Aileu 2, Ainaru 2, Vikeke 2, Bobonaru 2, Baukau 1, Likisa 1, Manufahi 1, inklui Oecuse 1.

Nune'e, liga ba kazu dengue ne'ebé sa'e makaas iha Dili, tuir distribuisaun kazu, Postu Administrativu Dom Alexo mak n8meru boot liu ho kazu 1.512, hafoin Postu Administrativu Kristu Rei ho kazu 435, Na'in Feto 343, Vera-Kruz kazu hamutuk 283.

“Ne’e hatudu katak, kada loron, kazu espalla nafatin ba iha postu administrativu sira seluk,” MS subliña.

Ho ida ne’e, Ministériu Saúde kontinua informa ba públiku hotu, atu aprezenta aan iha fasilidade saúde sira ne’ebé besik, bainhria sente isin manas ka laran sae, liman ain sikun moras, atu bele hetan atendimentu husi médiku sira. 

Husu mós ba autoridade munispiu inklui lokais, atu bele orienta komunidade halao limpeza jeral iha ida-idak nia suku inklui aldei tomak, fase tanke, bidon ka balde semana ida dala ida, limpeza roda aat sira, bazu aifunan atu susuk labele natolun.