Deklarasaun ne’e hato’o husi Prezidente Repúblika, José Ramos Horta, relasiona ho politika ne’ebé Trump hakarak implementa iha ninia governasaun.
Tuir Horta, desizaun husi Amerika ne’e sei la fó impaktu ba estadu Timor-Leste uza duni 100% osan husi Orsamentu Jeral Estadu ba dezenvolvimentu nasional, laos depende ba ajudus husi rai li’ur.
Tuir Horta, durante ne’e ajuda balun husi rai liur barak liu gasta ba estudu ne’ebé sira rasik halo, selu sira-nia ema rasik ho karun tebtebes, no uitoan liu mak ba dezenvolvimentu rural.
“Ne'ebé impaktu ba Timor laiha. Bele impaktu karik ba ONG balun ne'ebé simu osan husi ajensia sira ne'e, ba sira-nia atividade. Atividade saida? balun ko'alia kona-ba Direitus Umanus, eleisaun, ba korrupsaun, buat sira ne'e, entaun sira ne'e mak bele lakon, governu, estadu laiha preokupasaun ba ida ne'e," dehan PR Horta ba jornalista sira hafoin vizita estadu ba Abu Dhabi, iha aeroportu internasionál Nicolau Lobato, Komoro, Kuarta (05/02).
PR Horta hatutan, nia la preokupa kona-ba sirkular husi Trump atu taka USAID.
“Se karik taka, Timor buka parseira seluk. Sira-nia direitu soberanu, sira hakarak koa sira-nia despeza, sira sei haree, sira sei sukat buat ne'ebé sira-nia interese.”
"Ha'u hanoin di'ak liu ita mós halo avaliasaun nune'e haree parseira balun hakarak kontinua ka la'e, dala-ruma buka parseira seluk ita presiza, portantu ladun preokupa ho ida ne'e," katak nia.
