Ministru Obras Publiku, Samuel Marcal informa, molok ne’e governu hasai komunidade sira iha area mota-ibun Bidau ho hanoin atu halo duni jardin, maibé haree fila fali ba planu atu loke rute foun ba Bekora nune’e presiza halo mudansa uitoan.
“Se ita loke luan husi Bekora mak ita loke to'o mai iha Bidau Senggol mak ne'e sei afeita ba trafiku ne'e sei maka'as. Tanba ne'e mak ita sei muda uitoan dezeñu husi jadin Bidau Sengol ne'e muda uitoan par ita bele loke jalur rua ka dirasaun rua ne'e husi Bidau Sengol ba to'o iha Bekora," dehan Ministru Samule hafoin reuniaun Konsellu Ministru, iha Palásiu Governu, Kuarta (05/02).
Ba haluan estrada Kuluhun, Samuel dehan, levantamentu dadus hotu ona. Uma-kain balun hahú kompleta ona dokumentus no seluk hahú ona pagamentu.
"Ha'u agradese tebtebes tanba sira iha kolaborasaun ne'ebé di'ak, kontribuisaun ne'e hatudu katak sira mós hadomi rai ne'e no sidade Dili ne'e la'o ba oin. Entaun ha'u liu husi ne’ebá ha'u haree sira mós balun komesa sobu daudaun."
"Ita mós aproveita espasu ne'e mak ladún boot, agora dadaun ne'e hanesan projetu polotu ida par ita atu hakoi fiu, hanesan fiu eletrisidade no fiu fibra otika ne'ebé mak haree mengganggu ka atrapala loos jardin, entaun ita atu halo hanesan pilotu ida," nia dehan.
Bainhira pilotu ne’e la’o di’ak, nia dehan, sei espande uitoan nune’e iha Dili laran fiu sira hakoi hotu ba rai.
"Parte seluk tanba ita lorloron ba hakilar hela ahi mate, ne'e tanba mós problema ida ne'e, tanba tempu udan hanesan ne'e ai sira mós buras, anin huu uitoan fiu sira kona malu, konslet, afeita ba eletrisidade mate," nia dehan.
