Tuir Komunikadu ne'ebé Online INDEPENDENTE asesu iha pajina Ministeriu Edukasaun haktuir, hafoin Ministeriu Edukasaun (ME) halo dialogu ho reprezentante Eis-Profesorres Kontratadus 2023 iha loron 3 fulan-Fevereiru 2025 maka konsidera ba regras sira ne’ebe hatur iha Dekretu-Lei 31/2023 de 31 de Maiu no mós kondisaun sira balun.
Tan ne'e, Ministeriu Edukasaun hakarak reafirma desizaun Ministeriu Edukasaun nian konaba pasu sira atu solusiona problema Eis Profesor Kontratadu 2023 ne’ebé la’o ona durante tinan ida resin.
Nune’e, ME sei servisu hamutuk ho KFP oferese Teste Espesial ba Eis Profesor Kontratadu 2023 ne’ebé prienxe kriterius atu sai professor iha futuru.
"Teste Espesial nia sentidu katak teste ne’e oferese deit ba grupu Eis Profesor Kontratadu 2023, ME sei tetu hodi fó solusaun tuir regras ba estatutu Eis Profesor Kontratadu 2023 ne’ebé la prinxe kriterius tuir teste espesial tanba sira ho deit diploma sekundaria," dehan Komunikadu ne'ebé Online INDEPENDENTE asesu iha Pájina ME, Kinta (06/02).
Komunikadu ne’e haktuir, problema Eis Profesor Kontratadu 2023 sei halo fazeadamente, sei hala’o uluk teste espesial no ikus sei fó solusaun ba Eis Profesor Kontratadu 2023 ne’ebé ho de'it diploma sekundaria.
Husi biban ne’e, ME mós hakarak esklarese katak liga ho teste espesial ba Eis Profesor Kontratadu 2023 sei hala’o ho pasu sira hanesan, Eis Profesor Kontratadu 2023 sei hala’o teste dahuluk, hafoin loke teste jeral ba Bolsa Kandidatus Professores.
Tanba, ME sei fasilita matrix (kisi-kisi) ba Eis Profesor Kontratadu 2023 atu estuda, prepara-aan antes tuir teste. Matrix nu’udar materia jeral ba teste espesial nian. Nune’e, espera katak ho preparasaun ne’ebé di’ak Eis Profesor Kontratadu 2023 sira sei hetan mós rezultadu diak iha teste.
"Teste espesial sei hahú halo ba ESG-Tec-Voc, hafoin teste ba nivel Ensinu Baziku bazeia ba nesesidades, hakarak mós informa, iha teste Bolsa Kandidatus Professores iha tinan kotuk ne’ebé halo dala rua ona, iha Eis Profesor Kontratadu 2023 porvolta 200 resin mak passa iha teste refere," tenik komunikadu refere.
Nune'e, Ministeriu Edukasaun hakarak enkoraja ba Eis Profesor Kontratadu 2023 ne’ebé seida’uk hola parte iha teste sira iha tinan kotuk (2023), atu bele uza oportunidade diak iha teste espesial, atu nune’e hotu-hotu bele kontribui ba edukasaun ida ho kualidade no ba jerasaun sira iha futuru.
