Tribunal hasai ninia desizaun ne’e tanba haree katak restaurante refere okupa espasu públiku.

Sekretáriu Estadu Asuntu Toponomía no Organizasaun Urbana (SEATOU), Germano Santan Brites informa, iha 5 Novembru 2024, nia parte simu notifikasaun husi tribunál kona-ba restaurante Cossete.

"Tersa (05/11) ha'u simu ona notifikasaun husi Tribunál Rekursus sobre restaurante ida iha Bebonuk nian, parte Pantai Kepala nian ne'ebé mak restaurante na'in hatama ba iha Tribunál Primeira Intansia. SEATOU ho ekipa konjunta manan tiha kazu ne'e, tanba na'in ba restaurante mak hatama rekursus ba tribunál," dehan SE Germano ba jornalista Jornál INDEPENDENTE, hafoin partisipa debate OJE 2025, iha Parlamentu Nasionál, Kinta (07/11).

Nia hatutan, Tribunal hato’o desizaun ba SEATOU atu mantein sobu restaurante ne'e tanba okupa espasu públiku.

"Depois Tribunál Rekursus mós hato'o nafatin desizaun ba iha SEATOU par mantein desizaun (Tribunal) Primeira Intansia katak ita tenke sobu, tanba nia airin varanda ne'e okupa iha espasu públiku, iha tan trotoar leten," nia dehan.

SE Germano konta, bainhira restaurante Cossete iha prosesu konstrusaun, ekipa fó hela de’it avizu atu labele kontinua, maibé na’in ba restaurante ne’e kontinua konstrusaun.

"Ita hetan iha ne'ebá señór badaen ida, iha uma leten ita bolu tuun mai, ita fó hanoin katak para ona kontrusaun, hatete ba na'in koalia ho diresaun Munisípiu Dili, ho SEATOU par ita bele muda airin ne'e ba moru laran, la bele okupa iha trotoar leten."

“Maibé realidade na'in hakarak koko governu no estadu nia forsa, ekipa konjunta halo hela avizu mós na'in ba hatama ona kazu ne'e ba tribunál antes, entaun nia rezultadu mak agora daudaun SEATOU ho ekipa konjunta simu,” dehan nia.

Ho notifikasaun ne’ebé SEATOU simu ne’e, SE Germano dehan, nia parte sei haree tempu livre hodi sobu restaurante Cossete.

"Uitoan tan ita haree tempu ne'e livre, haree par bele depois ita bele baku rahun ona fatin sira ne'ebé mak estadu no governu manan. Ita la'ós ba duni de'it povu kiik sira faan iha estrada boot, maibé sira ne'ebé mak halo hela airin iha valenta leten ka varanda ne'ebé mak tama tiha veleta, ita haree sira ne'e par hadai dala ida," katak nia.

Tuir nia, investimentu ne'e importante ba rai ida maibé tenke fó konsiderasaun no hakruk ba lei no dekretu lei ne’ebé iha.

"Se ita hakarak investe iha sidade Dili tenke koopera ho estadu, liu-liu governu liu husi Terras no Propriedade, Obras Públiku ba ida Organizasaun Urbana ne'e, bele haree fatin sira ne'ebé mak iha, merese par ita bele harii kontrusaun. Se lae hanesan agora daudaun akontese. Na'in sira komprende, hatene hela, mais hakarak ba tribunál, entaun estadu no governu prontu par hein. Ami hein to'o ohin loron no fim ita hein desizaun husi Tribunál Rekursus," nia dehan.

Ba kompensasaun, nia dehan, governu sei la selu kompensasaun ba restaurante Cossete tanba ekipa konjunta fó avizu ona maibé sira la koopera.

"Restaurante Cossete sei la hetan kompensasaun tanba ita koalia antes tiha ona, na'in ne'e sente dehan katak iha hela kbiit ka iha forsa par hasoru estadu. Ita husik lori ba, tribunál deside ona, koopera ho estadu no governu. Kona-ba rekompensa ne'e laos ha'u-nia problema," dehan nia.

Molok ne’e, iha 28 Maiu 2024, ekipa husi Ministériu Obras Publika ne’ebé tuun hodi sukat Restaurante Cossete – Tea & Bistro, konsidera restaurante ne’e okupa espasu públiku ho naruk metru rua no luan metro 27.

Iha 28 Maiu, hafoin prazu notifikasaun husi Autoridade Munisipiu Dili nian remata, ekipa husi Ministériu Obras Publika tuun hodi sukat espasu públiku ne’ebé restaurante ne’e okupa.

Husi rezultadu sukat ne’e, ekipa MOP identifika katak restaurante ne’e okupa espasu públiku ne’ebé loloos uza ba dalan la’o ain no valeta.

Na’in ba Restaurante Cossete, Eufrasia Vieira, lamenta ho notifikasaun ne’ebé sira simu. Tanba tuir nia, rai ne’e rai privadu ne’ebé nia sosa desde tinan 2001.

Eufrasia dehan, iha 21 Maiu, nia parte simu notifikasaun husi Autoridade Munisipiu Dili ne’ebé fó prazu loron neen ba sira atu hamamuk fatin.

Hafoin simu notifikasaun ne’e, iha 24 Maiu, Eufrasia hato’o karta ba Tribunal hodi kontesta.

"Sira fó notifikasaun ne'e (iha 21 Maiu) hotu iha 26 Maiu ne'e. Iha Sesta semana kotuk ami mós hatama ona karta ba tribunál, maibé ami mós hein hela sira nia asaun, apakah sira servisu loos ka lae, tuir regras ka lae, entaun sira fó ami notifikasaun iha loron neen, entaun ami iha direitu atu hato'o karta ba tribunal," dehan Eufrasia ba jornalista sira, iha nia knaar fatin, Pantai Kelapa, Tersa (28/05).

Nu’udar sidadaun, nia dehan, nia prontu koopera ho governu, maibé tanba rai ne’e rai privadu, bainhira hakarak sobu tenke selu indinimizasaun.

"Ne'e la'ós rai públiku, ne'e rai privadu, se rai privadu entaun la'ós Sekretáriu Estadu (SEATOU) nia servisu, ne'e tenke ba Terras Propriedade ho Ministreriu Obras nian, mai par koalia halo nusa par fó ami-nia ganti rugi," dehan nia.

Restaurante ne’ebé nia harii ne’e, Eufrasia dehan, fó ona servisu ba joven Timor-oan na’in 26, ne’ebé simu salariu boot liu salariu minimu.

“Se estadu halo hanesan ne’e, joven sira ne'ebé hetan servisu bele lakon,” dehan nia.